Հայաստանն ու Քաթարը պայմանագիր են նախաստորագրել` Հայաստանից Քաթար որակյալ աշխատուժ ներգրավելու մասին:
Հունիսի 6-8-ին Քաթարի աշխատանքի նախարար Նասեր Բին Աբդալլահ ալ-Համիդիի հրավերով այդ երկիր է մեկնել ՀՀ աշխատանքի եւ սոցիալական հարցերով նախարար Արթուր Գրիգորյանի գլխավորած պատվիրակությունը:
Պատվիրակության կազմում ընգրկված են եղել ՀՀ տարածքային կառավարման նախարարության միգրացիոն պետական ծառայության պետ Գագիկ Եգանյանը, ՀՀ ԱԳՆ եւ Միգրացիայի միջազգային կազմակերպության Հայաստանի գրասենյակի ներկայացուցիչներ:
Արթուր Գրիգորյանը հանդիպումներ է ունեցել Քաթարի աշխատանքի նախարարի, առեւտրաարդյունաբերական պալատի նախագահի տեղակալի, Համադ բժշկագիտական համալիրի եւ գործատու այլ գործակալությունների ղեկավարների հետ:
Հանդիպումների ընթացքում քննարկված հարցերի շրջանակում փոխադարձ կարեւորվեց Հայաստանից Քաթար որակյալ աշխատուժի ներգրավման կարեւորությունը, մասնավորապես առողջապահության, ինժեներաճարտարապետական, տեխնոլոգիական ոլորտներում:
ՀՀ աշխատուժի օգտագործման իրավական եւ աշխատանքային պայմանագրի դրույթները հստակեցնելու նպատակով կայացած փորձագիտական քննարկման արդյունքում նախաստորագրվեց «ՀՀ եւ Կատարի միջեւ Քաթարի տարածքում Հայաստանի աշխատուժի օգտագործման մասին համաձայնագիրը»:
