«Ճամփորդիր առանց Covid-19-ի» ծրագիրը հաջողությամբ է մեկնարկել: Այս մասին այսօրվա՝ փետրվարի 4-ի կառավարության նիստին ասաց վարչապետ Նիկոլ Փաշինյանը:

«Ընդամենը 7 քաղաքացու դեպքում է խոչընդոտ առաջացել մեկնելու, խոչընդոտը տեխնիկական բնույթի է, իսկ մեկնողների թիվը հազարավոր է: Բայց պետք է ասել, որ նաեւ Հայաստան եկողների թիվն է շատ մեծ, եւ սա եւս կարեւոր է տնտեսության համար»,- ասաց Փաշինյանը՝ հավաստիացնելով, որ սա նաեւ ճանապարհ է բացում տուրիզմի զարգացման համար:

Փոխվարչապետ Մհեր Գրիգորյանն իր հերթին ասաց, որ Հայաստանից արդեն 3900 մարդ է մեկնել, մինչդեռ հանրապետություն է եկել 3400 քաղաքացի: «ՀՀ քաղաքացու անձնագրով մեկնածների թիվը 1423 է, իսկ ժամանածների թիվը՝ 1263»,- պարզաբանեց նա:

Ինչ վերաբերում է 7 քաղաքացիներին, որոնց Մոսկվայի օդանավակայանից հետ են ուղարկել, փոխվարչապետը հայտնեց, որ նախնական տեղեկություններով՝ նրանք մեկնել են թեստը հանձնելու QR կոդի թղթային տարբերակով:

Առողջապահության նախարար Անահիտ Ավանեսյանն էլ հավելեց, որ ծրագիրը մեկնարկել է՝ նախ ընդգրկելով երկու լաբորատորիա, բայց դրանց եւս վեցն են միացել:

Այսպիսով Գրիգորյանը հերքեց Փաշինյանի այն հայտարարությունը, որ պիլոտային ծրագիրը գործելուց հետո իբր Հայաստան է եկել ավելի շատ քաղաքացի, քան մեկնել է: