Ռուսաստանից վտարված եվրոպացի դիվանագետները՝ Գերմանիայից, Լեհաստանից եւ Շվեդիայից, հիանալի հասկացել են, որ խախտում են Ռուսաստանի օրենքները, քանի որ ցույցերը, որոնց նրանք մասնակցել են, չհամաձայնեցված են եղել, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, տեղեկացնում է «ՌԻԱ Նովոստին»:
Նա նշել է, որ «Դիվանագիտական հարաբերությունների մասին» Վիեննայի կոնվենցիան պարունակում է դրույթ այն մասին, որ «արտոնություններից եւ անձեռնմխելիությունից օգտվող բոլոր անձինք պարտավոր են, առանց վնաս հասցնելու իրենց արտոնություններին եւ անձեռնմխելիությանը, հարգել ընդունող երկրի օրենքներն ու կանոնները»: Միեւնույն ժամանակ, Զախարովան հիշեցրել է, որ Ռուսաստանում դեռ անցյալ տարվա մարտին արգելել են բոլոր հասարակական եւ զանգվածային միջոցառումների անցկացումը։
«Արտասահմանյան դիվանագետները լավ տեղյակ էին դրան: Այսպիսով, Շվեդիայի եւ Լեհաստանի գլխավոր հյուպատոսությունների եւ Գերմանիայի դեսպանության աշխատակիցների մասնակցությունը հունվարի 23-ին եւ 31-ին անցկացված միջոցառումներին ոչ միայն միջամտություն է Ռուսաստանի Դաշնության ներքին գործերին, այլեւ ընդունող պետության օրենքների գիտակցված խախտում է»,- ասել է Զախարովան ճեպազրույցում:
Անցյալ շաբաթ ՌԴ ԱԳՆ-ը հայտնել էր, որ Ռուսաստանում չհամաձայնեցված ցույցերին մասնակցած՝ Շվեդիայի, Լեհաստանի եւ Գերմանիայի դիվանագետները ճանաչվել են «պերսոնա նոն գրատա» եւ մոտ ժամանակներս կլքեն երկիրը: Խոսքը Սանկտ Պետերբուրգում Շվեդիայի Թագավորության եւ Լեհաստանի Հանրապետության գլխավոր հյուպատոսությունների եւ Մոսկվայում Գերմանիայի Դաշնային Հանրապետության դեսպանության դիվանագետների մասին է: