Աֆղանստանի շուրջ խաղաղ բանակցությունները բավարար առաջընթացի չեն հասել, որպեսզի թույլ տան արտասահմանյան զորքերի դուրսբերումը: Այս մասին ՆԱՏՕ-ի իր գործընկերների հետ վիրտուալ հանդիպումից առաջ հայտարարել է Գերմանիայի պաշտպանության նախարար Անեգրետ Կրամպ-Կարենբաուերը:
Աֆղանստանի կառավարությունն ու «Թալիբան» շարժման գրոհայինները Դոհայում խաղաղ բանակցություններ են սկսել անցյալ տարվա սեպտեմբերին, սակայն բանակցությունները փակուղի են մտել։
ՆԱՏՕ-ի երկրների պաշտպանության նախարարները հինգշաբթի օրը կքննարկեն` արդյոք «Թալիբանը» կատարում է ԱՄՆ-ի հետ 2020թ. առանձին խաղաղ համաձայնագիրը, որը գրոհայիններին կոչ է անում զսպել գրոհները եւ օտարերկրյա զորքերը դուրս բերել մինչեւ մայիսի 1-ը:
«Խաղաղ բանակցություններում առաջընթացի բացակայությունը նշանակում է, որ մենք պետք է պատրաստվենք անվտանգության փոփոխվող իրավիճակին եւ աճող սպառնալիքին՝ ինչպես միջազգային զորքերի, այնպես էլ մեր սեփական զինվորների համար»,- ասել է Կրամպ-Կարենբաուերը:
Գերմանիան շուրջ 1100 զինվոր է ներդրել ՆԱՏՕ-ի առաքելության համար, որի ընդհանուր թիվը կազմում է 9600 մարդ, որոնք սովորեցնում են աֆղանական ուժերին եւ նրանց օժանդակություն են ցուցաբերում: Առաքելության կազմում ներառված են նաեւ ԱՄՆ-ի շուրջ 2500 զինծառայողներ:
Շատերը մտավախություն ունեն, որ Աֆղանստանում արտաքին միջամտության երկու տասնամյակների ընթացքում գրանցված առաջընթացը կարող է արագորեն խաթարվել, եթե ՆԱՏՕ-ի ուժերը դուրս բերվեն, ինչը սպառնալիքի տակ կդնի տարբեր ոլորտներում հաջողությունները՝ կանանց իրավունքներից մինչեւ ժողովրդավարություն։
Կրամպ-Կարենբաուերը կրկնել է ՆԱՏՕ-ի գլխավոր քարտուղար Յենս Սթոլթենբերգի մեկնաբանությունները, ով ավելի վաղ ասել էր, թե «Թալիբանը» պետք է ավելին անի Միացյալ Նահանգների հետ 2020 թվականի խաղաղ համաձայնագրի պայմանները կատարելու համար:
