Տեխնոլոգիական պրոցեսում միշտ ռիսկի գործոն կա, բայց հաշվի առնելով ռուսական ընկերությունների փորձը, հուսով ենք, որ ռիսկի գործոնը շատ փոքր է եւ խնդիրներ չեն առաջանա։ Այս մասին այսօր՝ մարտի 18-ին, լրագրողների հետ զրույցում ասաց Հայկական ԱԷԿ տնоրեն Մովսես Վարդանյանը՝ պատասխանելով հարցին՝ արդյոք կա ռիսկի գործոն, որ 2021 թվականին ԱԷԿ գործող բլոկի շահագործման ժամկետը չի երկարաձգվի։
«2015-2016 թվականներից «Ռոսատոմի» հետ միասին ռուսական վարկի միջոցներով մենք սկսեցինք մեր գործող էներգաբլոկի շահագործման նախագծային ժամկետի երկարացման ծրագիրը։ Այդ պահին՝ 2015-2016 թվականներին 10 տարվա հեռանկար ունեինք՝ այսինքն 2026 թվականին մեր գործող բլոկն արդեն 40 տարի շահագործման մեջ կլինի, եւ, հաշվի առնելով մյուս երկրների փորձը, մենք պատրաստվում ենք ևս 5-10 տարով շարունակել մեր գործող բլոկի շահագործումը, այսինքն՝ 2026 թվականից հետո համապատասխան հիմնավորումների դեպքում շարունակել կայանի շահագործումը դեպի 45-50 տարի»,- ասաց նա:
Նշենք, որ այս տարի մայիսի 15-ից 141 օրով գործող էներգաբլոկը կկանգնեցվի, կիրականացվեն ռեակտորի իրանի մետաղի թրծաթողման աշխատանքներ և վերանորոգում, ինչի արդյունքում այս տարվա վերջին ԱԷԿ-ը հույս ունի Հայաստանի Հանրապետության կարգավորող մարմնից ստանալ նոր լիցենզիա՝ առայժմ 10 տարով։
2021 թվականին վերանորոգման աշխատանքները, կայանի տնօրենի կարծիքով, կարելի է ամենաբարդ փուլը համարել աշխատանքների կազմակերպման առումով. աշխատանքներ կտարվեն կայանի անվտանգության բարելավման, երկրորդի էներգաբլոկի ռեակտորի իրանի մետաղի թրծաթողման ուղղությամբ եւ այլն: Իրանի մետաղի թրծման նախապատրաստական աշխատանքներն այս պահին կատարված են։
«Դրանից հետո մենք հույս ունենք 10 տարվա արտոնագիր ստանալ պետական կարգավորող մարմնից»,- եզրափակեց Մովսես Վարդանյանը:
