Այսօր հիմնվել է «Ուժեղ Հայաստան Ռուսաստանի հետ. հանուն նոր միության» շարժումը: Այս մասին այսօր՝ մարտի 19-ին, «Հայ-ռուսական ռազմավարական միության արդիական հիմնախնդիրները ժամանակակից սպառնալիքների եւ մարտահրավերների առջեւ» թեմայով քննարկման ժամանակ ասաց «Սահմանադրական իրավունք» միություն» կուսակցության նախագահ Հայկ Բաբուխանյանը:
Նրա խոսքով՝ Հայաստանի արտաքին քաղաքականության բազմավեկտոր հաշվեկշիռը «ի-ի»-ի բանաձեւի համաձայն պահպանվել է ընդհուպ մինչեւ 2018-ի իրադարձությունները:
«Միեւնույն ժամանակ, սառը պատերազմում պարտվելուց հետո, ինչպես նաեւ հետխորհրդային մյուս երկրներում հաստատված «ժողովրդավարական տոտալիտարիզմի» նոր կարգերը լայն հնարավորություններ են բացել տոտալիտար աղանդների եւ կործանարար հասարակական կազմակերպությունների ակտիվ ներթափանցման համար:
«Շուկայական արժեքների, արեւմտյան կենսակերպի քարոզում, հոգեւորականությունից հրաժարում, պատմության վերանայում Հայաստանի «նոր» քաղաքացու կրթության համար հանգեցրել է ոչ միայն հինգերորդ, այլեւ վեցերորդ շարասյան ձեւավորման՝ սորոսիզմի ներթափանցմամբ բոլոր պետական եւ հասարակական կառույցներում: 1997-ից Հայաստանում Սորոսի հիմնադրամի միջոցով բաժանվել է 60 մլն դոլարի չափով դրամաշնորհ»,-ասաց նա:
Բաբուխանյանը հիշեցրեց, որ 2018-ին Հայաստանում տեղի ունեցավ գունավոր հեղափոխություն, իշխանության եկան արեւմտամետ ուժեր, որոնք պաշտպանում էին ԵԱՏՄ-ից Հայաստանի դուրս գալը: Նրանց հետագա գործողությունները հանգեցրին հայ-ռուսական հարաբերությունների վստահության մակարդակի կտրուկ անկման:
«Երկրորդ արցախյան պատերազմը (2020 թ. սեպտեմբեր-նոյեմբեր) ոչ միայն բացահայտեց հայ ժողովրդի անվտանգության համակարգի ողջ խոցելիությունը, այլեւ արմատապես փոխեց իրավիճակը երկրում եւ տարածաշրջանում: Դա հաշվի առնելով՝ Հայաստանին անհրաժեշտ է նոր ազգային գաղափարախոսություն, որը պետք է հիմնված լինի անվտանգության, պետականության պահպանման, տարածաշրջանում նոր ճարտարապետություն ստեղծելիս իր շահերի պաշտպանության, խաղաղության պահպանման եւ հարեւանների հետ հարաբերությունների կառուցման, մրցունակ տնտեսության զարգացման, հայրենադարձության համար, պահպանելով ազգի քաղաքակրթական ինքնիշխանությունը, կայուն քաղաքական համակարգը: Այս նոր ազգային գաղափարի իրագործումը հայկական պետականության զարգացման նոր փուլ է՝ չորրորդ հանրապետության կառուցում»,-հավելեց նա:
