Դեռեւս հնարավոր չէ որոշել Հյուսիսատլանտյան դաշինքին Ուկրաինայի եւ Վրաստանի անդամակցության ժամանակը, քանի որ դրա համար անհրաժեշտ է կոնսենսուս: Այս մասին ՆԱՏՕ-ի գլխավոր քարտուղար Յենս Սթոլթենբերգը խոսել է Հարավային Ֆլորիդայի համալսարանի կողմից կազմակերպված վիրտուալ միջոցառման ժամանակ, հաղորդում է ՏԱՍՍ-ը:
«2008-ին Բուխարեստում կայացած ՆԱՏՕ-ի գագաթաժողովում մենք հայտարարեցինք, որ Ուկրաինան եւ Վրաստանը կդառնան ՆԱՏՕ-ի անդամներ: Մենք ժամկետ չենք սահմանել»,- ասել է Սթոլթենբերգը: «Այժմ մենք օգնում ենք Ուկրաինային եւ Վրաստանին մոտենալ անդամակցությանը: Մենք նրանց օգնում ենք անվտանգության ոլորտում բարեփոխումներ իրականացնելու, զինված ուժերի դեմոկրատական վերահսկողությունը ամրացնելու, ՆԱՏՕ-ի չափանիշներին աստիճանաբար մոտենալու եւ դաշինքին անդամակցելուն մոտենալու հարցում»,- ասել է ՆԱՏՕ-ի գլխավոր քարտուղարը:
«Բայց անդամակցության մասին որոշումն ընդունվում է կոնսենսուսով: Բոլոր դաշնակիցները պետք է համաձայնեն սրա հետ: Ուստի չեմ կարող նշել այն ժամանակը, երբ դաշնակիցները կհամարեն, որ Ուկրաինան եւ Վրաստանը լիովին պատրաստ են անդամակցել դաշինքին»,- հավելել է նա:
Գլխավոր քարտուղարը նաեւ հաստատել է, որ «այն պատկերացումը, թե ՆԱՏՕ-ի ընդլայնումը սպառնալիք է կամ սադրանք, վտանգավոր է, դա չի համապատասխանում իրականությանը»: Ըստ Սթոլթենբերգի՝ «Ռուսաստանը դադարել է հավատալ դաշինքի հետ փոխգործակցությանը, համագործակցությանը»: