ՌԴ ԱԳՆ-ն հերքել է ԵԱՀԿ Մինսկի խմբի ԱՄՆ նախկին համանախագահ Ռիչարդ Հոգլանդի այն պնդումները, որ եթե նույնիսկ հայկական եւ ադրբեջանական կողմերը համաձայնվեին ՌԴ ԱԳ նախարար Սերգեյ Լավրովի ղարաբաղյան հակամարտության կարգավորման վերաբերյալ գաղափարներին, ապա ռուսական կողմը, միեւնույն է, դրանց իրականացման չի գնա:
«Բացարձակապես չի համապատասխանում: Ռուսաստանը միշտ պատրաստ է եղել կարգավորման այն տարբերակին, որին կաջակցեին հակամարտության կողմերը: Այս մասին բազմիցս ասել է Ռուսաստանի Դաշնության նախագահը: Այս դիրքորոշումը որոշիչ է ռուսական համանախագահության աշխատանքում:
Թե ինչով է առաջնորդվել Ռիչարդ Հոգլանդը նման պնդումներով հանդես գալով, ես չեմ պատրաստվում գուշակել:
Ցանկանում եմ ընդգծել, որ կարգավորման առաջարկների փաթեթը, բացի Ադրբեջանի և Հայաստանի ղեկավարների հռչակագրից, ներառում էր նաեւ Ռուսաստանի, ԱՄՆ-ի եւ Ֆրանսիայի համատեղ հայտարարությունը դրան աջակցելու մասին: Այս երկու փաստաթղթերը, գումարած ՄԱԿ Անվտանգության խորհրդի բանաձեւը, որը հաստատում է Լեռնային Ղարաբաղի հակամարտության կարգավորման վերաբերյալ առաջարկությունների փաթեթը, կազմում էին այն ժամանակ ռուսական առաջարկների էությունը, որոնց մասին մանրամասն տեղյակ էին մյուս համանախագահ երկրները՝ ԱՄՆ-ն եւ Ֆրանսիա, եւ որոնց նրանք լիովին աջակցում էին»,- նշել է ՌԴ ԱԳՆ-ն:
Հիշեցնենք, որ ICR Center-ի իր հոդվածում Ռիչարդ Հոգլանդը մասնավորապես նշել էր. «Այն ընթացքում, երբ ես ԱՄՆ-ի համանախագահն էի, Ռուսաստանի արտաքին գործերի նախարար Սերգեյ Լավրովը բացահայտեց հակամարտության կարգավորման իր ծրագիրը, որը շատ նման էր առկա Մադրիդյան սկզբունքներին, որը անմիջապես ոչ պաշտոնապես հայտնի դարձավ:
Երբ, այսպես կոչված, «Լավրովի ծրագիրը» հրապարակվեց, ես հարցրեցի իմ գործընկերոջը` Ռուսաստանի համանախագահ դեսպան Պոպովին՝ արդյոք Կրեմլը իսկապես կհամաձայնի՞ իրականացնել, եթե Երեւանն ու Բաքուն զիջեն եւ ընդունեն այն: Նա անկեղծ պատասխանեց. «Իհարկե՝ ոչ»: Սա, առավել քան ցանկացած այլ բան, ինձ թույլ տվեց հասկանալ, որ Լեռնային Ղարաբաղը պարզապես երկկողմ խնդիր չէ Հայաստանի եւ Ադրբեջանի միջեւ»:
Ապագա ունի՞ արդյոք ղարաբաղյան կարգավորման հարցով ԵԱՀԿ Մինսկի խումբը