ԵԱՀԿ Մինսկի խմբի համանախագահները պատրաստակամություն են հայտնել շարունակել բանակցությունները Լեռնային Ղարաբաղի շուրջ նախկին սկզբունքների շրջանակներում, եւ այս իմաստով նրանց հայտարարությունը շատ օգտակար էր: Այս մասին ապրիլի 14-ին Ազգային ժողովի նիստին Կառավարության 2020 թվականի գործունեության հաշվետվության ներկայացման ժամանակ, պատասխանելով պատգամավորների հարցերին, ասաց ՀՀ վարչապետ Նիկոլ Փաշինյանը:
Ըստ նրա, կարեւոր է, որ հայտարարության մեջ, մասնավորապես, ընդգծվում է ԵԱՀԿ Մինսկի խմբի համանախագահների պատրաստակամությունը՝ շարունակել բանակցային գործընթացը հայտնի սկզբունքների շրջանակներում: «Իսկ այդ սկզբունքներից մեկը Լեռնային Ղարաբաղի կարգավիճակի վերջնական որոշում է ենթադրում»,- շեշտեց Փաշինյանը:
Նա նաեւ հավաստիացրեց, որ Հայաստանը պատրաստ է խոսել Ղարաբաղի վերջնական կարգավիճակի մասին:
Նշենք, որ ԵԱՀԿ Մինսկի խմբի միջնորդները նախօրեին հայտարարություն էին տարածել, որում նշվում է, որ նրանք պատրաստ են վերսկսել աշխատանքային ուղեւորությունները տարածաշրջան, այդ թվում՝ Լեռնային Ղարաբաղ:
