Ես առավել քան վստահ եմ, որ ում որ այստեղ բերման են ենթարկել կամ հրավիրել են, սա քաղաքական հետապնդում է: Այս մասին, այսօր՝ ապրիլի 22-ին, Քննչական կոմիտեի մոտ լրագրողների հետ զրույցում նշեց ԱԺ պատգամավոր Գեւորգ Պետրոսյանը:
«Նորմալ տրամաբանության շրջանակներում,, պետք է որ ինչի մեջ մեղսագրվում է բերման ենթարկված անձը, այդ արարքները հաստատ երեկ չեն եղել, մի քանի ամիս առաջմ, մի քանի տարի առաջ են եղել, հիմա ի՞նչն է պատճառը, որ գիշերը որոշեցին դա անել: Այսինքն եթե նախօրեին Նիկոլի խայտառակ այցը չլիներ Սյունիք, բնականաբար, այս մարդիկ չէին կանչվելու: Այսինքն սա քաղաքական պատվեր է, իրենք քաղաքական պատվեր են կատարում, ներգրավվում են Նիկոլ Փաշինյան խղճուկ անձնավորության քմահաճույքների բավարարման խաղի մեջ, որի համար վաղը պատասխան են տալու»,-ասաց նա:
«Ես հարց եմ տալիս, եթե համ Մեղրիի քաղաքապետն է հանցագործ, համ գորիսի, համ Կապանի, բա էդ մարդիկ ինչո՞ւ են ազատության մեջ մինչեւ այսօր: Թե՞ պետք է ՆԻկոլ Փաշինյանը գար խայտառակ լիներ, հետո նոր որոշեին, որ քաղաքապետերը հանցագործներ ե՞ն: Ամոթ է»,-ասաց նա:
Հարցին, թե եթե Նիկոլ Փաշինյանը գիտեր իր հանդեպ վերաբերմունքը Սյունիքի մարզում, ինչու գնաց, Գեւորգ Պետրոսյանը պատասխանեց. «Սյունիքի մարզն առաջինը ատամ ցույց տվեց խղճուկ վարչապետին: Հիմա սա որոշել էր տրյուկ անել, ասել էր՝ եթե կարողանամ Սյունիքի մարզը կոտրել, որպես ամենաըմբոստ մարզ, ուրեմն մյուսները հեշտ կլինի: Բայց ինքը «դետսկի մատ» եղավ: Ես սյունեցիների ցավը տանեմ, երեք մատի կոմբինացիա ցույց տվեցին նրան»:
Ինչ վերաբերում է նրան, որ փոխոստիկանապետը հայտարարել է, որ երեք Սյունիքում տեղի է ունեցել առերեւույթ հանցագործություն, ԱԺ պատգամավորն արձագանքեց, որ դա եղել է ինքնաբուխ հավաք, հետեւաբար համայնքապետերը հավաքի անդամների արարքների համար պատասխանատու չի:
Ավելի վաղ NEWS.am-ը հայտնել էր, որ Նիկոլ Փաշինյանի՝ Սյունիքի մարզ այցի ժամանակ սյունեցիները թույլ չեն տվել նրան մտնել համայնքներ: Բողոքի ակցիա է իրականացվել Սյունիքի տարբեր համայնքներում, որտեղ քաղաքացիները վանկարկել են «Նիկո՛լ, դավաճա՛ն, թո՛ւրք, հողատո՛ւ», հնչել են նաև տարբեր հայհոյանքներ և վիրավորանքներ, որոնց ներքո նա լքել է քաղաքները:
Փաշինյանը թիկնազորի ուղեկցությամբ մտել է Սյունիքի մարզպետարան և խորհրդակցություն անցկացրել, որի ընթացքում, մասնավորապես, նշել է. «Ես ուզում եմ անդրադառնալ այսօր Մեղրիում տեղի ունեցած միջադեպին․ հստակ է, որ տեղի է ունեցել օրենքի խախտում և ես ակնկալում եմ, որ հանրապետության իրավապահ մարմինները շատ հստակ և կոշտ կերպով կարձագանքեն իրավիճակին»: Իսկ արդեն գիշերը մի շարք քաղաքացիների են բերման ենթարկել, մասնավորապես, Մեղրի համայնքի ղեկավար Մխիթար Զաքարյանին:
