Ոստիկանները խուզարկություն են իրականացրել գործարար «Դոն Պիպո» մականունով հայտնի Արթուր Ասատրյանի առանձնատանը։ Այս մասին NEWS.am-ի հետ զրույցում ասաց Ասատրյանի փաստաբան Մկրտիչ Վասակյանը։
«Խուզարկություն են իրականացրել մոտ մեկ ամիս առաջ Էջմիածնում տեղի ունեցած ծեծկռտուքի առթիվ հարուցված քրեական գործով, ինչպես նաեւ օրերս Էջմիածնում տեղի ունեցած սպանության առթիվ հարուցված քրեական գործով։ Հիմնականում խուզարկությունը կապված էր հարուցված հին քրեական գործի շրջանակներում։ Փնտրում էին ապօրինի զենք-զինամթերք, սակայն ոչինչ չեն չգտան»,- ասաց Վասակյանը։
Հիշեցնենք, որ մոտ մեկ ամիս առաջ մեծ թվով ոստիկաններ կրկին խուզարկություն էին իրականացրել Արթուր Ասատրյանի առանձնատանը։
Փաստաբանը նշեց, որ ինքը ուշացած է գնացել խուզարկությանը եւ չգիտի՝ նախորդ խուզարկության սցենարով են իրականացրել, թե՝ ոչ։
Նա պնդեց, որ այդ քրեական գործերի հետ Արթուր Ասատրյանը որեւէ առնչություն չունի։
Հիշեցնենք, որ մայիսի 5-ի գիշերը Էջմիածնում սպանություն է տեղի ունեցել։ Մամուլում տարածված լուրերի համաձայն սպանվածը «Դոն Պիպոյի» թիկնապահներից 29-ամյա Ռազմիկ Սողոյանն էր։
