Այսօր մենք վերջ ենք տալիս բոլոր խոսակցություններին եւ պատրաստվում ենք արտահերթ խորհրդարանական ընտրություններին: Այդ մասին Հայաստանի Ազգային ժողովում մայիսի 10-ին հայտարարել է «Լուսավոր Հայաստան» կուսակցության պատգամավոր Անի Սամսոնյանը:
ԱԺ ամբիոնից ընթերցելով հայտարարության տեքստը, որը մի քանի օր առաջ հրապարակել էր «Լուսավոր Հայաստան» կուսակցության առաջնորդ եւ խորհրդարանական խմբակցության նախագահ Էդմոն Մարուքյանի կողմից, Սամսոնյանը դիմել է իշխող մեծամասնության ներկայացուցիչներին եւ Կառավարությանը:
«Ամենամեծ չարիքը, որը դուք պատճառել եք այս երկրին, հասարակությունը «սեւերի» ու «սպիտակների» բաժանելն էր, հանրության շրջանում ատելություն տարածելը, որը հանգեցրել է հարեւանների, բարեկամների միջեւ թշնամանքին եւ անգամ ընտանիքների բաժանմանը: Այո, այդպիսի երեւույթներ կան, եւ դա ամենամեծ չարիքն է, որը դուք գործել եք»,-ասել է պատգամավորը:
Սամսոնյանի կարծիքով՝ հենց դա է վերջին երեք տարվա ընթացքում իշխանությունների միակ լուրջ «ձեռքբերումը»:
«Եթե ամեն ինչ ճիշտ եք արել, ինչո՞ւ է խորհրդարանը ցրվում: Ինչո՞ւ է ի հայտ եկել պահանջարկ, որ այս խորհրդարանն այլեւս չծառայի Հայաստանի շահերին: Դուք ձեզ այդ հարցը տվե՞լ եք»,-հետաքրքրվել է Սամսոնյանը:
