Եվրոպացի օրենսդիրները պետք է քննարկեն 2019 եւ 2020 թվականներին ԵՄ-ի եւ Թուրքիայի հարաբերությունների առաջընթացի մասին Եվրահանձնաժողովի եւ Եվրախորհրդարանի զեկույցները՝ նախքան կքվեարկեն այն բանաձեւի հարցով, որը կսահմանի հետագա քայլերն այն բանից հետո, երբ Անկարայի անդամակցության բանակցությունները սառեցվել էին 2018-ի հունիսին:
Եվրոպական ժողովրդական կուսակցություն (ԵԺԿ) խմբակցությունը հայտարարել է, որ կարծում է, թե անդամակցության շուրջ Թուրքիայի հետ բանակցությունները պետք է «պաշտոնապես դադարեցվեն, եթե ընթացիկ բացասական միտումը շտապ եւ հետեւողականորեն չփոխվի»:
«Քանի դեռ նախագահ Ռեջեփ Թայիփ Էրդողանը շարունակում է սադրել ԵՄ-ին եւ նրա անդամ-պետություններին, խախտում է Հունաստանի եւ Կիպրոսի տարածքային ամբողջականությունը եւ Թուրքիային հեռացնում է եվրոպական ստանդարտներից, օրենքի գերակայությունից եւ մարդու հիմնարար իրավունքներից, հարաբերությունների բարելավման որեւէ հեռանկար չկա»,- ԵԺԿ մամուլի քարտուղարին է մեջբերում Parliament Magazine-ը։
«Սա երկրում իրավիճակի վերաբերյալ ամենախիստ խորհրդարանական զեկույցն է, որն արտացոլում է վերջին երկու տարվա ընթացքում Թուրքիայում օրենքի գերակայության եւ մարդու իրավունքների լուրջ եւ շարունակական հետընթացը»,- ասել է եվրապատգամավոր Նաչո Սանչես Ամորը:
«Զեկույցը հստակ ազդանշան է ուղարկում ինչպես Թուրքիային, այնպես էլ ԵՄ մյուս ինստիտուտներին եւ անդամ-երկրներին՝ առանց Թուրքիայում մարդու իրավունքների եւ օրենքի գերակայության ոլորտում անհապաղ առաջընթացի, ԵՄ-ի եւ Անկարայի միջեւ հարաբերությունների բարելավում չի կարող լինել»,- հավելել է նա:
