Մեր երկիրի ապագան առանց Ռուսաստանի, առանց ռուսական բանակի համատեղ ջանքերի՝ անհնարին է տարածաշրջանում ապահովել խաղաղություն կամ մնալ Արցախում։ Այս մասին արցախցիների հետ հանդիպմանը հայտարարել է Արցախի նախագահ Արայիկ Հարությունյանը։
Նշենք, որ Արայիկ Հարությունյանը նախորդ օրերին այցելել է Մարտունու շրջանի Թաղավարդ, Կարմիր շուկա եւ Ասկերանի շրջանի Սարուշեն, Շոշ, Խանապատ եւ Խրամորթ համայնքներ։
Թաղավարդցիների հետ հանդիպմանը, Արայիկ Հարությունյանն ասել է. «Թաղավարդը մեր երկրի պատկերն է, ինչպես կորցրել ենք երկրի մի մասը, այնպես էլ կորցրել ենք Թաղավարդի մի մասը։ Դուք լավ գիտեք՝ կենաց–մահու կռիվ ենք տվել, իհարկե, մենք ունեցել ենք խուճապ, փախուստի դեպքեր, բայց Թաղավարդը վառ օրինակն է. ավելի քան 20 օր ամեն օր հարձակում, փորձել են գրավել Թաղավարդը, Կարմի Շուկան եւ ճանապարհ հարթել Ֆիզուլի, Կարմիր Շուկա, Շուշի գնալու համար։ Մեզ հաջողվել է նրանց պլանի մի մասը ձախողել եւ այսօր ունենալ հնարավորություն գոնե հայրենիքի այս մասում մեր երկիրը կառուցել»։
