Ֆրանսիական Դիժոնում ոստիկաններն ու փրկարարներն օգնության են հասել մի կնոջ, ով գրեթե 50 հազար եվրո էր լցրել քաղաքի կենտրոնական հրապարակի շատրվանի մեջ, հաղորդում է «ՌԻԱ Նովոստի»-ն:
«Անսովոր ձկնորսությունը տեղի է ունեցել կենտրոնական հրապարակի շատրվանում: Դրանում լողում էր մի կին՝ շրջապատված գրեթե 50 հազար եվրո մանր թղթադրամներով: Կնոջն օգնության էին հասել: Գումարը դուրս էր բերվել ցանցերի օգնությամբ»,- ասվում է ոստիկանության արեւմուտքում գտնվող Կոտ դ'Օր դեպարտամենտի հայտարարության մեջ:
Նախնական տվյալներով՝ գումարը կազմել է 44 770 եվրո, հիմնականում՝ 20 եւ 50 եվրոյանոց թղթադրամներով:
Տեղական Bien Public պարբերականը նշում է, որ օպերացիան, չնայած արտաքին անհեթեթությանը, իրավապահների կողմից որոշակի ջանքեր էր պահանջել: Մասնավորապես, նրանք պետք է անվտանգության միջոցներ ստեղծեին շատրվանի շուրջ, որպեսզի լողացող փողերը թաքցնեին հետաքրքրասեր անցորդների գրպաններից: Դեպքի վայր էր ժամանել անձամբ թաղապետի գրասենյակի ղեկավար Դանիլ Աֆսուն:
Թե ինչ հանգամանքներում է 51-ամյա կինը փողը գցել շատրվանի մեջ, դեռ պարզ չէ: Պարբերականի տվյալներով՝ նա հոգեկան խանգարումներ ունի: