Ներկայումս Հարավային Կովկասի տարածաշրջանը հասարակությունների միջեւ վստահություն հաստատելու խիստ կարիք ունի: Այս մասին Վրաստանում ԵՄ ներկայացուցչությունում կայացած մամուլի ասուլիսում հայտարարել է Ավստրիայի եվրոպական եւ միջազգային գործերի դաշնային նախարար Ալեքսանդր Շալլենբերգը, տեղեկացնում է «Արմենպրեսը»:
Նա անդրադարձել է Երեւանում ՀՀ վարչապետի պաշտոնակատար Նիկոլ Փաշինյանի, ինչպես նաեւ Բաքվում Ադրբեջանի նախագահ Իլհամ Ալիեւի հետ հանդիպումներին՝ հավելելով, որ հանդիպումների ընթացքում տեղի են ունեցել ինտենսիվ քննարկումներ: «Մեր նպատակն էր հասկանալ, թե ինչպես կարելի է վստահություն կառուցել: Այս այցը հաստատեց այն, ինչ մենք արդեն գիտեինք՝ վստահությունը ամենակարեւոր ռեսուրսն է, որը անհրաժեշտ է տարածաշրջանին եւ որը նրան չի բավարարում: Մեր նպատակն է սերմանել այս վստահությունը: Մենք գիտենք, որ Լեռնային Ղարաբաղում պատերազմի հասցրած վերքերը դեռ բաց են, բայց մեզ ապաքինման գործընթաց է պետք: Այս այցը ցույց տվեց, որ կողմերը գիտակցում են գործընթացի անհրաժեշտությունը, եւ որ նրանք գործընկերների կարիք ունեն՝ այս գործընթացը սկսելու համար: Եվրամիությունը պատրաստ է ցանկացած օգնություն տրամադրել»,- ասել է Շալլենբերգը:
Նա նշել է, որ այս հարցում ԵՄ-ն բարձր է գնահատում Վրաստանի դերը, որի շնորհիվ հնարավոր դարձավ Ադրբեջանի կողմից պահվող հայ գերիների ազատումը եւ Հայաստանի կողմից ականապատ դաշտերի քարտեզների փոխանցումը: «Կարծում եմ, որ այս եռակողմ համագործակցությունը ձեռնտու է բոլոր կողմերին»,- ասել է Ավստրիայի արտգործնախարարը` նշելով, որ ԵՄ-ն ամբողջովին սատարում է նման գործընթացները։
