ՀԱՊԿ միացյալ շտաբի պետ Անատոլի Սիդորովը կարծում է, որ կարիք չկա Տաջիկստանում ներգրավել ՀԱՊԿ հավաքական ուժերը՝ Աֆղանստանի հետ սահմանի պաշտպանության համար: Այս մասին հայտնել է ՏԱՍՍ-ը:
«Այն ամենից, ինչ մենք այստեղ ուսումնասիրել ենք եւ քննարկել բարձրաստիճան պաշտոնյաների, ուժային կառույցների ղեկավարների հետ, օրինակ՝ ՀԱՊԿ անդամ այլ երկրներից ներգրավման հաշվին անձնակազմի թվի աճ, եկել ենք այն եզրակացության, որ տվյալ պահին դրա կարիքը չկա», - ասել է նա:
«Անհրաժեշտության դեպքում, պետությունների ղեկավարների որոշմամբ, Հավաքական անվտանգության խորհուրդը պատրաստ է օգտագործել այդ ուժերը: Բայց առայժմ իմ անձնական կանխատեսումն այն է, որ իրավիճակը չպետք է այդքան հասունանա: Համենայն դեպս, այն միջոցները, որոնք ձեռնարկվում են այստեղ տեղում, օգնում են կայունացնել իրավիճակը, որպեսզի ամեն ինչ աստիճանաբար կարգավորվի», - հայտնել է շտաբի ղեկավարը:
«Լինելով Տաջիկստանում, հանդիպելով, շփվելով, ուսումնասիրելով շատ նյութեր, կասեմ, որ անձամբ ես բավական լավատեսական կանխատեսում եւ լիակատար վստահություն ունեմ, որ ամեն ինչ լավ կլինի: Բայց վառոդը պետք է չոր պահել»,- հավելել է նա:
Հուլիսի 5-ին Տաջիկստանը հայտարարել է սահմանամերձ հատվածներով երկրի տարածք աֆղանական կառավարական 1037 զինծառայողների անցնելու մասին, որոնք ստիպված են եղել նահանջել թալիբների հետ զինված բախումների ժամանակ, ինչը անհանգստացրել է Տաջիկստանի կառավարությանը եւ ստիպել նրան աջակցության խնդրանքով դիմել ՀԱՊԿ-ին: