Microsoft-ը կհատկացնի ամբողջ աշխարհում աշխատակիցներին 1,5 հազարական դոլարի չափով բոնուսային քարտ համավարակի պատճառով, հաղորդում է ՏԱՍՍ-ը՝ հղում անելով The Verge-ին:
Կորպորացիայի ներքին փաստաթղթի համաձայն՝ գումարը կվճարվի՝ «նշանավորալով բացառիկ եւ բարդ ֆինանսական տարվա ավարտը»: Գումարը կվճարվի աշխատակիցներին, որոնք զբաղեցնում են կորպորացիայի ստորաբաժանումների ղեկավարների տեղակալներից ցածր պաշտոններ, որոնք աշխատանքի են անցել Microsoft-ում ոչ ուշ, քան 2021 թվականի մարտի 31-ը: Բոնուսային գումարները ստանալու իրավունք ունեն նաեւ ոչ լրիվ աշխատանքային օրով աշխատող անձինք:
Հաղորդվում է, որ Microsoft-ն ունի 175 հազար աշխատակից ամբողջ աշխարհում: The Verge-ի գնահատմամբ՝ նախաձեռնությունը կարժենա կորպորացիայի համար շուրջ 200 միլիոն դոլար, ինչը մի քանի անգամ պակաս է, քան երկու օրվա ընթացքում ընկերության շահույթը: Microsoft-ի մի քանի դուստր ընկերությունների աշխատակիցները չեն ստանա այդ բոնուսը:
2020 թվականին Facebook-ի ղեկավարությունը որոշել էր շուրջ 45 հազար իր աշխատակիցներին հատկացնել հազարական դոլար համավարակի պատճառով: 2020 թվականի դեկտեմբերին Amazon-ը վարձատրել է իր աշխատակիցներին 300-ական դոլարով տոնական սեզոնի ընթացքում աշխատելու համար:
