Twitter Inc-ը արձանագրել է ամբողջ աշխարհում կառավարությունների՝ լրագրողների եւ լրատվական գործակալությունների հրապարակած կոնտենտի հեռացման պահանջների կտրուկ աճ, հաղորդել է Reuters-ը:
Թափանցիկության մասին իր զեկույցում Twitter-ը հայտնել է, որ ամբողջ աշխարհում իր հարթակում 199 լրագրողների եւ լրատվական գործակալությունների ստուգված հաշիվները 2020 թվականի երկրորդ կեսին կառավարությունների կողմից ենթարկվել են կոնտենտ հեռացնելու 361 օրինական պահանջների, ինչը 26 տոկոսով ավելի է տարվա առաջին կեսի տվյալների համեմատ: Ընկերությունը չի պարզաբանել, թե որ երկրներն են պահանջներ ներկայացրել, կամ լրագրողներին ու լրատվական գործակալություններին վերաբերող որքան իրավական պահանջներ է հարթակը բավարարում:
Twitter-ը զեկույցում նշել է, որ Հնդկաստանը դարձել է բոլոր տեղեկատվական հարցումների ամենամեծ աղբյուրը 2020 թվականի երկրորդ կեսին` առաջ անցնելով ԱՄՆ-ից, որը երկրորդն է հարցումների ծավալով:
Ընկերությունը հայտնել է, որ հուլիսի 1-ից դեկտեմբերի 31-ն ընկած ժամանակահատվածում ստացել է տեղեկատվության տրամադրման ավելի քան 14.500 հարցում եւ հարցումների 30 տոկոսին ի պատասխան՝ տրամադրել է ամբողջական տեղեկատվությունը կամ դրա մի մասը:
Նման տեղեկատվական հարցումներ կարող են կատարել կառավարությունները կամ կազմակերպությունները, որոնք ցանկանում են ճշտել անձանց ինքնությունը, ովքեր հարթակում կեղծանուններով են հանդես գալիս: