Գյումրիի «Ավտոկայան» թաղամասում հայտնաբերված նորածնի մորը դեռ չեն գտել։ Այս մասին NEWS.am-ի հետ զրույցում հայտնեց Շիրակի մարզային քննչական վարչության պետ Աղասի Իսահակյանը։
«Երեխայի մորը գտնելու ուղղությամբ աշխատանքները դեռ շարունակվում են։ Բոլոր ուղղություններով հավասարապես քննություն ենք կատարում, որպեսզի հայտնաբերենք մորը, բայց այս պահի դրությամբ մոր ինքնությունը դեռ հայտնի չէ»,- նշեց նա։
Նորածինը շարունակում է մնալ Գյումրիի «Մոր և մանկան ավստրիական հիվանդանոցում»։ Նրա վիճակը բավարար է։
«Քաշը գնալով ավելացնում ենք։ Առողջական խնդիրներ չունի։ Դեռ չգիտենք, երբ դուրս կգրվի, մենք դրանով չենք զբաղվում, քանի որ գործընթացներ են ընթանում երեխային մանկատուն ուղղարկելու ուղղությամբ»,- NEWS.am-ի հետ զրույցում ասաց հիվանդանոցի վերակենդանացման բաժնի բժշկուհի Մարգարիտա Հարությունյանը։
Բժշկուհու խոսքով՝ երեխան դեռ անուն չունի։
Հիշեցնենք, որ հուլիսի 3-ի առավոտյան Գյումրիի Շահումյան փողոցում՝ ավտոկայանի մերձակայքում, հայտնաբերվել էր տղա նորածին։
Նորածին լքելու փաստով հարուցված է քրեական գործ քրեական օրենսգրքի 34-106 հոդվածի հատկանիշներով՝ մոր կողմից նորածին երեխայի սպանությունը, որը ավարտին չի հասցվել անձի կամքից անկախ հանգամանքներով։
Գյումրիի Շահումյան փողոցում հայտնաբերվել է նորածին տղա երեխա