Ամերիկյան Microsoft տեխնոլոգիական ընկերությունը ներկայացրել է Windows օպերացիոն համակարգի հետ մատակարարվող իր ֆիրմային Edge բրաուզերը զարգացնելու ծրագրերը: Ընկերության կայքում տեղադրված փաստաթղթերում երեւում է, որ Microsoft Edge 92-ը կզրկվի օգտվողների համար առավել նյարդայնացնող առանձնահատկություններից մեկից՝ բրաուզերից կհանեն մուլտիմեդիա բովանդակության ավտոմատ գործարկումը, որը լռելյայն միացված է, հայտնում է Planet-today-ը:

Ինչպես բացատրել են ծրագրի մշակողները, սկսած Edge-ի իննսուներկուերորդ տարբերակից, մուլտիմեդիա բովանդակության լռելյայն միացված ավտոմատ գործարկումը կհեռացվի: Համապատասխան կարգավորումը այժմ «Թույլատրված»-ից կփոխվի «Սահմանափակ»-ի։ Օգտագործողները ստիպված չեն լինի Edge-ը կարգավորել՝ հոլովակների ավտոմատ ցուցադրումն անջատելու համար:

Նոր գործառույթը դեռ մշակման փուլում է՝ օգտվողները այն կստանան նոր Edge-ի բետա-տարբերակի հետ միասին, որը կարող է հայտնվել այս ամսվա վերջին: Դրանից հետո, մի քանի շաբաթ անց, Microsoft-ը գործառույթը կավելացնի իր ֆիրմային բրաուզերի կայուն թարմացված տարբերակում։

Statcounter-ի տվյալներով՝ այս տարվա հունիսին Microsoft-ի բրաուզերը իր ժողովրդականությամբ գերազանցել է Firefox-ին, եւ այդպիսով դարձել է աշխարհի երեք ամենաշատ օգտագործվող բրաուզերներից մեկը: Edge-ն այժմ զիջում է միայն այնպիսի հսկաների, ինչպիսիք են Chrome-ը եւ Safari-ն: