News
Լրահոս
News
Չորեքշաբթի
Սեպտեմբեր 22
Տեսնել լրահոսը


«Պատիվ ունեմ» դաշինքում ես վստահ եմ, որ չկան մարդիկ, որոնք դեմ են քվեարկում կամ անվավեր են սարքում քվեաթերթիկը, հուսով եմ, որ նման մարդիկ չկան նաեւ «Հայաստան» խմբակցությունում: Այս մասին, այսօր՝ օգոսստոսի 5-ին, ԱԺ-ում լրագրողների հետ զրույցում նշեց «Պատիվ ունեմ» խմբակցության ղեկավար Արթուր Վանեցյանը՝ անդրադառնալով նրան, որ արդեն երկրորդ անգամ Իշխան Սաղաթելյանը չի ընտրվում ԱԺ փոխխոսնակ:

«Կարող եմ նաեւ վստահությամբ ասել, որ չկան այդպիսի մարդիկ: Երրորդ փոխնախագահ ընտրելու պարտականությունը իշխանությանն է, իշխանության բեռն է: Եթե իշխանություններն ուզում են, որ ԱԺ-ն ձեւավորվի, եւ անցնի բնականոն աշխատանքի, թող ապահովեն ԱԺ փոխնախագահի ընդդիմադիր թեկնածուի ընտրությունը»,-ասաց նա:

Նշենք, որ «Հայաստան» խմբակցության կողմից ԱԺ փոխնախագահի պաշտոնում առաջադրված թեկնածու Իշխան Սաղաթելյանը երկրորդ քվեարկությունից հետո կրկին չընտրվեց Ազգային ժողովի փոխնախագահ։

Քվեարկությանը մասնակցել է 103 պատգամավոր։ Սաղաթելյանի թեկնածությանը կողմ է քվեարկել 49 պատգամավոր, դեմ՝ 49. անվավեր է ճանաչվել 5 քվեաթերթիկ։

Առաջին ընտրության ժամանակ Իշխան Սաղաթելյանի օգտին քվեարկել էր 53 պատգամավոր եւ ընդամենը մեկ ձայն չէր բավականացրել ընտրվելու համար:

«Հայաստան» խմբակցության ղեկավար Սեյրան Օհանյանը հայտարարել էր, որ իրենց խմբակցությունից Դավիթ Սեդրակյանը (Մհեր Սեդրակյանի որդին - խմբ), հարգելի պատճառներով բացակայում էր նիստից:

Հիշեցնենք նաեւ, որ ԱԺ նախագահ Ալեն Սիմոնյանն ավելի վաղ լրագրողների հետ զրույցում ասել էր, որ իշխող ուժն ապահովելու է անհրաժեշտ նվազագույն ձայները, որպեսզի Սաղաթելյանն ընտրվի այդ պաշտոնում։ Սակայն, ինչպես տեսանք, մեկ ձայնի պատճառով, Սաղաթելյանին չհաջողվեց ընտրվել այդ պաշտոնում։

!
Այս նյութը հասանելի է նաև   Русский
Տպել
Ամենաշատ