2011 թվականին Հայաստանում մեկնարկեց համայնքների ընդլայնման եւ միջհամայնքային ասոցիացիաների ստեղծման հայեցակարգը: Նոր օրենքի կիրառումն սկսվել է 2016 թվականին՝ իշխանությունների նախաձեռնությամբ: Այս մասին ԱԺ-ում տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության մշտական հանձնաժողովի նախաձեռնած խորհրդարանական լսումների ժամանակ «Վարչատարածքային բաժանման մասին» օրենքում եւ հարակից օրենքներում փոփոխություններ եւ լրացումներ կատարելու մասին օրինագծերի փաթեթի քննարկման ընթացքում ասաց հանձնաժողովի նախագահ, «Քաղաքացիական պայմանագիր» խմբակցության պատգամավոր Վահե Գալումյանը:
Նրա խոսքով՝ առաջին փուլում միավորվել են հանրապետության 486 համայնքներ: Արդյունքում 54 խոշորացված համայնք առաջացավ: «Այս օրենսդրական նախաձեռնության համաձայն նախատեսվում է միավորել Հայաստանի 441 համայնք: Արդյունքում կհայտնվի 37 նոր խոշորացված համայնք»,-ասաց Գալումյանը, ով խոստովանեց, որ ներկայիս իշխանությունները՝ չնայած գյուղացիների բողոքներին, շարունակում են «նախկինների» քաղաքականությունը: