Հայաստանի պետբյուջեի փաստացի եկամուտները 2021թ. առաջին կիսամյակում կազմել են 790 մլրդ դրամ, ինչը 10,3 տոկոսով ավելի է, քան անցած տարվա նույն ժամանակամիջոցում։ Այս մասին ԱԺ ֆինանսավարկային եւ բյուջետային հարցերի մշտական հանձնաժողովի նիստի ժամանակ, սեպտեմբերի 27-ին, 2021թ. առաջին եռամսյակում պետբյուջեի կատարման մասին հաշվետվության քննարկման ընթացքում ասաց ՀՀ ֆինանսների նախարար Տիգրան Խաչատրյանը:
Այսպես, նրա խոսքով՝ սկզբում կանխատեսվում էր, որ առաջին կիսամյակում պետության եկամուտները կկազմեն 698 մլրդ դրամ։ «Այնուամենայնիվ, դրանք փաստացի կազմեցին 790 մլրդ դրամ, չնայած անգամ պետբյուջեի ճշգրտված ծրագրով կանխատեսվում էր 740 մլրդ դրամից ոչ ավելի։ Արդյունքում՝ ճշգրտված ծրագրից շեղումը կազմել է 52 մլրդ դրամ»,- նշեց նախարարը։
Խաչատրյանը նաեւ տեղեկացրեց, որ անցած տարվա նույն ժամանակամիջոցի համեմատ եկամուտները փաստացի ավելացել են 10,3 տոկոսով կամ 74,2 մլրդ դրամով։
