Կրասնոդարի երկրամասում աշխատող Ֆանագորյան հնագիտական արշավախմբի մասնագետները նախատեսում են արհեստական ինտելեկտի միջոցով հավաքել 2500 տարի առաջ կոտրված ամֆորաները, գրել է ՏԱՍՍ-ը:
Արդեն երկրորդ տարին է, ինչ հնագետները փորձում են վերականգնել Ֆանագորիայի առաջին գաղութարարների տանը հայտնաբերված ամֆորաները: Մինչ օրս պահպանվել են խեցեղենի բազմաթիվ բեկորներ: Մասնագետներին հաջողվել է ձեռքով վերականգնել մի քանի անոթներ, սակայն դա չափազանց աշխատատար գործընթաց է: Այդ իսկ պատճառով հնագետները որոշել են փորձել օգտագործել ժամանակակից թվային տեխնոլոգիաները՝ բեկորների ավտոմատ ընտրության համար:
Արհեստական բանականությունը կգնահատի ամֆորայի յուրաքանչյուր կտորի բնութագիրը եւ դրանք կհամեմատի այլ բեկորների հետ: Այնուամենայնիվ, նախ պետք է ստեղծել բեկորներից յուրաքանչյուրի եռաչափ մոդելը: Դրա համար յուրաքանչյուր կտոր պետք է մի քանի անգամ լուսանկարվի տարբեր կողմերից:
«Ծրագիրը [որը կօգնի կոտրված ամֆորաների հավաքմանը] պետք է դրանք [բեկորները] վերլուծի ձեւի, հաստության եւ այլ պարամետրերի առումով: Մեր օրերում արագորեն զարգանում են արհեստական բանականությունն ու մեծ տվյալների տեխնոլոգիաները, եւ ձեռքով նման աշխատանքներ կատարելը այժմ ավելի արագ է ընթանում: Սակայն ցանկանում ենք ներգրավվել նոր գործիքների մշակման գործընթացում, փորձարկել նոր մեթոդ եւ տեսնել, թե արդյո՞ք հնարավոր կլինի լուծել այսպիսի տքնաջան եւ ժամանակատար խնդիրը թվային տեխնոլոգիաների միջոցով», - ասել է արշավախումբի ղեկավարի տեղակալ Սերգեյ Օստապենկոն՝ ՏԱՍՍ-ի հետ հարցազրույցում:
