Իրանա-ադրբեջանական հարաբերություններում առաջացած իրավիճակը պետք է դիտարկել, առաջին հերթին, տարածաշրջանում տրանսպորտային հաղորդակցության ուղիների խթանման քաղաքականության համատեքստում: Այս մասին NEWS.am-ի թղթակցի հետ հարցազրույցում ասաց քաղաքական գիտությունների դոկտոր, էներգետիկայի բնագավառի փորձագետ Վահե Դավթյանը:
Իրանը, լինելով Հյուսիս-Հարավ միջանցքի անբաժանելի մասը եւ, ըստ էության, լինելով այս միջանցքի հիմնական կլաստերը, ըստ փորձագետի, որեւէ կերպ չի կարող թույլ տալ, որ հայկական Սյունիքը կտրվի Հայաստանից, եւ պատնեշ ստեղծվի Իրանի եւ Հայաստանի միջեւ: Թեհրանը պնդում է, որ Ադրբեջանում գործում է սիոնիստական ռեժիմ, որը կարող է խանգարել Իրանին այս ճանապարհով ինտեգրվել Եվրոպային:
«Բացի այդ, այս բոլոր գործընթացները կապված են միջուկային զենքի ծրագրի հետ, որն իրականացնում է Թեհրանը: Դա պայմանավորված է նաեւ Պաղեստինի այն ուժերին Իրանի աջակցությամբ, որոնք շատ ակտիվ են Իսրայելի դեմ պայքարում: Բացի այդ, արեւմուտքում Իրանն ունի Թուրքիան, որը թեեւ ոչ պաշտոնական հռետորաբանության մակարդակում գտնվում է Իսրայելի հետ առճակատման մեջ, այնուամենայնիվ, բավական ինտենսիվ երկխոսություն է վարում Թել Ավիվի հետ: Հետեւաբար, Իրանին անհրաժեշտ է Սյունիքը՝ Կովկասով եվրոպական շուկա հետագա մուտքը ապահովելու համար:
Այստեղ, իհարկե, առաջին հերթին խնդիր է դրված իրանական գազի՝ Եվրոպա արտահանման հարցը, ինչը տեսականորեն կարող է խնդիրներ ստեղծել Ռուսաստանի համար, որն այսօր փորձում է հնարավորինս հավասարակշռել Արեւելք-Արեւմուտք եւ Հյուսիս-Հարավ տրանսպորտային նախագծերը: Իսրայելն իր հերթին ինտենսիվորեն փորձում է ամրապնդվել Արեւելք-Արեւմուտք միջանցքում (հաշվի առնելով նաեւ հրեական լոբբիի գործոնը, որը վերահսկում է Արեւելք-Արեւմուտք միջանցքով հետաքրքրվող մի շարք միջազգային արեւմտյան ընկերություններ) եւ աջակցում է Ադրբեջանին: Թել Ավիվի եւ Բաքվի միջեւ առկա է խորը ռազմատեխնիկական համագործակցություն: Դեռեւս 2016 թվականին նրանց միջեւ համաձայնագիր է ստորագրվել ռազմական համագործակցության խորացման մասին: Միանգամայն ակնհայտ է, որ այստեղ խոսքը հակաիրանական պլացդարմի ձեւավորման մասին է: Պատահական չէ, որ Թեհրանը տարիների ընթացքում, մի կողմ դնելով քաղաքական կոռեկտությունը, ուղղակիորեն հայտարարել է Ադրբեջանում սիոնիստական ռեժիմի առկայության մասին», - ընդգծեց Վահե Դավթյանը:
