Փոփոխությունների հայտնաբերման, վեբ մոնիտորինգի եւ աշխատանքի ավտոմատացման ոլորտում առաջատար Hexact ընկերությունը համագործակցության եռամյա պայմանագիր է կնքել SADA-ի եւ Google Cloud-ի հետ: Այս մասին հոկտեմբերի 30-ին Երեւանում հայտարարվել է ամենամյա Digitec Expo- ժամանակ։
«SADA»-ի և «Google Cloud»-ի փորձագետները կօգնեն հզորացնել «Hexact»-ի թիմը՝ տեխնիկական խորհրդատվությունների միջոցով՝ սերտորեն համապատասխանեցնելով բիզնեսի նպատակներն ու ռազմավարական արդյունքները։
«SADA»-ն և «Google Cloud»-ը մի շարք ճարտարապետական փորձաքննություններ են անցկացրել և կազմել լավագույն փորձը ներառող առաջարկների փաթեթ։ Այն թույլ կտա «Hexact»-ին իր հաճախորդների համար ավելի արագ ու ավելի հուսալի կերպով մշակելու լրացուցիչ տեխնիկական հնարավորություններ։
«Մենք ոգևորված ենք աշխատելու «Hexact»-ի թիմի հետ՝ առաջնորդելու նրանց թվային փոխակերպումը լավագույն փորձով և օգնելու մասշտաբների մեծացմանն ու հաճախորդների աճի սպասարկմանը։ Մեր նպատակն է հնարավորություն տալ «Hexact»-ին՝ «Google Cloud»-ի միջոցով իրենց հաճախորդների համար ավելի արագ և ավելի հուսալի կերպով մշակելու հավելյալ գործառույթներ»,- նշել է «SADA»-ի գլխավոր գործառնական տնօրեն Դենա Բերգը։
«Կայքերի մոնիտորինգի և աշխատանքի ավտոմատացման մեր հարթակներն օրական 60 միլիոն առաջադրանք են մշակում՝ զարգացման հնարավորություններ ստեղծելով աշխարհում ավելի քան 27,000 հաճախորդների համար։ Մենք պատրաստվում ենք ավելի շատ բիզնեսների աջակցել և «SADA»-ի ու «Google Cloud»-ի օգնությամբ մեծացնելու մեր ավտոմատացման շարժումը, որից օգտվելու համար ծրագրավորման գիտելիքներ չեն պահանջվում»,- նշել է «Hexact»-ի հիմնադիր տնօրեն Ստեփան Ասլանյանը։
Նա ընդգծել է, որ այս համագործակցությունը կընդլայնի մատուցվող ծառայությունների շրջանակը եւ նոր որակ կներդնի:
«Նման ընկերությունների մուտքը հայկական շուկա միշտ դրական ազդեցություն է ունենում։ Դա միշտ նոր գիտելիք է, նոր փորձ, նոր լուծումներ»,- ասաց Ստեփան Ասլանյանը։
