Մեքսիկայի սենոտներից (կրաքարե քարանձավի կամարի փլուզման հետեւանքով առաջացած խոռոչ՝ քաղցրահամ ջրով) մեկում հնագետները հայտնաբերել են հազվագյուտ նավակ, որն արդեն 1100 տարեկան է։ Այն օգտագործել է մայա ժողովուրդը, որն ապրել է այժմ ավերված Չիչեն Իցա քաղաքում, հայտնում է Popmech-ը։
Ավելի քան 1,5 մետր երկարությամբ փայտե արտեֆակտը հայտնաբերվել է Մարդաբանության եւ պատմության ազգային ինստիտուտի փորձագետների կողմից: Հնագետները կարծում են, որ նավակն, ամենայն հավանականությամբ, օգտագործվել է կա՛մ սենոտից ջուր հավաքելու, կա՛մ ծիսական արարողությունների ժամանակ սենոտին նվիրաբերումներ անելու համար։
Նավակի եւ հարակից ջրավազանների մոտ հայտնաբերվել են այլ արտեֆակտներ, ինչպես նաեւ քարանձավի քարե առաստաղի վրա մարդու կմախք եւ ձեռքով արված քանդակներ: Ժայռապատկերը կարծես ստեղծվել է մ.թ. 1200-1500 թվականներին:
