ԱՄՆ Օհայո նահանգի դատախազությունը 100 մլրդ դոլարի դատական հայց է ներկայացրել Facebook-ի դեմ, որը վերջերս վերանվանվել է Meta, երեխաների հետ աշխատանքի ալգորիթմների պատճառով, գրում է ՏԱՍՍ-ը՝ վկայակոչելով The Wall Street Journal-ը։
Հայցը ներկայացվել է ընկերության եւ պետական կենսաթոշակային համակարգի ներդրողների անունից, ովքեր պահանջում են Meta-ից 100 միլիարդ դոլարի վնասի փոխհատուցում։ «Ֆեյսբուքի ղեկավարությունը պնդում էր, որ հոգ է տանում մեր երեխաների մասին եւ զբաղվում է օնլայն-թրոլլերի արմատախիլ անելով, սակայն իրականում սեփական շահի համար ստեղծել է տառապանք եւ պառակտել օգտատերերին»,-թերթը մեջբերում է Օհայոյի գլխավոր դատախազ Դեյվ Յոթսի հայտարարությունը:
Հայցադիմումի համաձայն՝ ընկերության ղեկավարությունն այս տարվա ապրիլի 29-ից հոկտեմբերի 21-ը խախտել է դաշնային օրենքը՝ հանուն շահույթի՝ մոլորեցնելով հանրությանը, թե իր արտադրանքը ինչ բացասական ազդեցություն կարող է ունենալ անչափահասների վրա։ Հայցվորները, բացի վնասների փոխհատուցումից, պահանջում են Meta-ի ղեկավարությունից միջոցներ ձեռնարկել՝ սեփական ներդրողներին կրկին մոլորության մեջ չգցելու համար։
Սեպտեմբերին The Wall Street Journal-ը սկսել է հրապարակել մի շարք հոդվածներ ընկերությունում եւ նրա ծառայություններում վնասակար գործողությունների մասին: Մասնավորապես, նշվում է, որ ընկերության սոցիալական ցանցերը գովազդում են օգտատերերի առողջության համար պոտենցիալ վտանգավոր, բայց նրանց հետաքրքրություն առաջացնող բովանդակություն (օրինակ՝ անորեքսիայով արդեն տառապող աղջիկներին առաջարկվել է բաժանորդագրվել խմբերի, որտեղ քննարկվում էր քաշի կորուստը)։ Ուշադրություն գրավելու համար արմատական եւ նույնիսկ ծայրահեղական բովանդակությունը գովազդվել կամ չի զտվել։