Գործող իշխանությունը Հայաստանում ապազգային քաղաքականություն է իրականացնում գրեթե բոլոր ոլորտներում։ Այս մասին նոյեմբերի 26-ին լրագրողների հետ հանդիպմանն ասաց Երեւանի պետական համալսարանի արեւելագիտության ֆակուլտետի դեկան, թուրքագետ Ռուբեն Մելքոնյանը։
Նրա կարծիքով՝ երկրի քաղաքական վերնախավը հիմնականում բաղկացած է այն մարդկանցից, ովքեր զուրկ են ազգային մտածողությունից, չգիտեն իրենց ժողովրդի պատմությունը եւ չեն կարողանում դաշնակիցներին տարբերել թշնամիներից։ «Այս իշխանություններն հատել են բոլոր կարմիր գծերը։ Նրանք ատելության սերմեր ցանեցին հասարակության մեջ, եւ այդ ատելությունն ուղղված է Հայաստանի ազգային հերոսներին։ Այսօր թշնամու կերպարում նրանց մոտ հանդես են գալիս «նախկին իշխանությունները»։ Եվ դրանում նրանց հաջողվեց համոզել մեր հասարակության մի զգալի մասին։ Նրանց համար թշնամին նա չէ, ով կանգնած է սահմանից այն կողմ, ով դարեր շարունակ թշնամական քաղաքականություն է վարել մեր նկատմամբ։ Ես հիմա խոսում եմ Թուրքիայի մասին։ Նրանց համար թշնամիները նրանք են, ովքեր մեզ հետ ապրում են մեր երկրում։ Դրանք եւ այն գեներալներն են, ովքեր նպաստել են մեր հայրենիքի կայացմանը, եւ տարբեր հասարակական-քաղաքական գործիչներ, ովքեր, չնայած նախկինում թույլ տված բոլոր սխալներին, այնուամենայնիվ, հսկայական ներդրում են ունեցել այս երկրի կայացման եւ զարգացման գործում»,- ասաց արեւելագետը։
