News
Լրահոս
News
Չորեքշաբթի
Փետրվար 21
Տեսնել լրահոսը


Արդարադատությունն այսօր հաղթեց շնորհիվ իմ փաստաբանների. Իրապես այսօր ինձ համար շատ լավ օր է, տրամադրությունս բարձր է, ոգիս միշտ բարձր է եղել: Դատարանի դահլիճից դուրս գալուց հետո լրագրողների հետ զրույցում նշեց ԱԺ «Հայաստան» խմբակցության պատգամավոր, բժիշկ Արմեն Չարչյանը:

«Հիմա երկար բան չասեմ, ես շատ լուրջ առողջական խնդիրներ ունեմ, այս 5 ամսվա ընթացքում 24-25 տարվա դիաբետը իրեն շատ վատ ձեւով ցույց տվեց: Առավել եւս, որ այս 4-5 ամսվա ընթացքում ես զրկված եմ եղել լրատվությունից, առաջիկա իմ խնդիրը առողջությունս վերականգնելն է լինելու, հետո կտեսնենք: Ես երկրորդ ինֆարկտը ստացա ՔԿՀ-ում»,-ասաց Չարչյանը:

Հարցին, թե որն է լինելու առաջին բանը, որ անելու է դուրս գալուց հետ, նա կատակով պատասխանեց. «Արեցի, կնոջս համբուրեցի»:

Հիշեցնենք, որ քիչ առաջ Երեւանի ընդհանուր իրավասության դատարանը՝ նախագահությամբ դատավոր Վահե Միսակյանի, վերադառնալով խորհրդակցական սենյակից՝ հրապարակեց Արմեն Չարչյանի գործով միջնորդության վերաբերյալ իր որոշումը՝ վերացնելով նրա նկատմամբ խափանման միջոց կալանքը: Արմեն Չարչյանն ազատ արձակվեց նիստերի դահլիճից: Դատավորը հայտարարեց, որ խափանման միջոց է ընտրվում ստորագրությունը չհեռանալու մասին:

Որոշումից հետո նիստերի դահլիճում ծափահարություններ հնչեցին, դրսում Արմեն Չարչյանին դիմավորեցին նրա թիմակիցները:

Նշենք, որ ՀՀ Սահմանադրական դատարանը նախօրեին հրապարակել է իր դեկտեմբերի 7-ի որոշումը, ըստ որի պատգամավոր ընտրված անձինք չեն կարող լինել անազատության մեջ:

Տպել
Ամենաշատ