Մոսկվայում դատարանը «օրենքով գող» Յապոնչիկի սպանության մեջ երկու մեղադրյալներին 15 եւ 16 տարվա ազատազրկման է դատապարտել։
Հանցագործ աշխարհում որպես «օրենքով գող» Յապոնչիկ հայտնի Վյաչեսլավ Իվանկովի սպանության գործով մեղադրյալներ Մուրթազի Շադանիան եւ Ջամբուլ Ջանաշիան 15 եւ 16 տարվա ազատազրկման են դատապարտվել, հայտնում է ՏԱՍՍ-ը։
Նրանք իրենց պատիժը կկրեն խիստ ռեժիմի գաղութում։ Բացի այդ, ամբաստանյալների նկատմամբ մեկ տարվա ազատության սահմանափակում է սահմանվել։
Շադանիան եւ Դանաշիան մեղադրվում են հանգուցյալին հետապնդելու, նրա կենսակերպը եւ շարժման ուղիները ուսումնասիրելու մեջ։ Բացի այդ, նրանք հեղինակությանը սպանելու համար ձեռք են բերել դիպուկահար հրացան եւ զինամթերք, ինչպես նաեւ մեքենա, որն անհրաժեշտ էր իրենց ծրագրերն իրականացնելու համար:
2009 թվականի հուլիսի 28-ին Կախա Գազաեւը, Մուրթազի Շադանիան, Նուգզար Պապավան եւ Ջամբուլ Ջանաշիան ժամանել են «Թայվանական փիղ» ռեստորան։ Երբ Իվանկովը դուրս է եկել հաստատությունից, նրան մոտեցել է «Գազել» ատոմեքենա, որից Աստամուր Բուտբան մի քանի անգամ կրակել է Յապոնչիկի ուղղությամբ։ «Օրենքով գողը» հոկտեմբերի սկզբին մահացել է հիվանդանոցում։
Սպանության կազմակերպման մեջ մեղադրվում է «օրենքով գող» Իլյա Սիմոնիան (Մախո), ով հանցագործությունը կատարել է հանուն հանցավոր համայնքում ազդեցության ոլորտները վերաբաշխելու։ Դրա համար նա ներգրավել է մի խումբ մարդկանց, ովքեր մի քանի ամիս հետեւել են Յապոնչիկին։
