Դեկտեմբերի 23-24-ին Մոսկվայում տեղի է ունեցել Արցախյան պատերազմից հետո Հայաստանի եւ Ադրբեջանի էլիտաների առաջին հանդիպումը։ Այս մասին ամենշաբաթյա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Կարծում ենք, որ երկու երկրների հանրության ներկայացուցիչների միջեւ հանդիպումը հասել է իր նպատակին, այն է՝ բարիդրացիական շփումներ հաստատել երկու հարեւան երկրների գիտական, ստեղծագործական էլիտայի ներկայացուցիչների միջեւ՝ ստեղծելով բարենպաստ ֆոն Բաքվի եւ Երեւանի միջեւ հարաբերությունների հետեւողական կարգավորման համար»,-ասել է Զախարովան։
Նրա խոսքով՝ մասնակիցները միակարծիք են, որ իրենք տեսնում են մտավորականության դերը Ադրբեջանի եւ Հայաստանի ժողովուրդների միջեւ անվստահության աստիճանի նվազեցման գործում։ Կառուցողական երկխոսության տրամադրվածություն է դրսեւորվել, ի թիվս այլնի, զգայուն հումանիտար թեմաների քննարկման ժամանակ, որոնք են՝ Ադրբեջանի կողմից հայ ռազմագերիների վերադարձ, ականապատ դաշտերի մնացած քարտեզների փոխանցում Հայաստանի կողմից։ «Մենք աջակցում ենք, աջակցել ենք եւ կշարունակենք աջակցել նման նախաձեռնություններին։ Կարծում ենք, որ նման միավորող օրակարգը չափազանց արդիական է, քանի որ այն նպաստում է առարկայական պայմանավորվածությունների ձեռքբերմանը, որոնք մթնոլորտ են ստեղծում այլ ուղղություններով առաջ շարժվելու համար»,-ասել է Զախարովան։
Նա հավելել է, որ հեռանկարում ծրագրվում է նման շփումներ իրականացնել կանոնավոր կերպով, այդ թվում՝ Ադրբեջանում եւ Հայաստանում։
