ԱԱԾ հաղորդագրությունը, դրանից հետո ամբողջ քրեական գործի ընթացքը և այս պահին դատարանում գտնվող քրեական գործը զուտ ենթադրություն են, քրեական գործով որևէ փաստական տվյալ չի հաստատվում։ Այս մասին, այսօր՝ հունվարի 26-ին, Սիսիանում լրագրողների հետ զրույցում ասաց «Սիսական» ջոկատի հրամանատար Աշոտ Մինասյանի պաշտպան Միհրան Պողոսյանը, ով լրագրողներին ուղեկցել էր Սիսիան քաղաքի այն հատվածը, որը ներկայացված է ԱԱԾ տեսանյութում:
«Տարածքի հետ կծանոթացնեմ, և դուք ինքներդ ականատես կլինենք՝ ինչ աստիճանի ենթադրությունների շարան է գործում»,-ասաց նա։
Պաշտպանը մանրամասնեց, որ այն վայրը, որը ԱԱԾ տեսանյութում կա, գտնվում է փողոցի բանուկ հատվածի մոտակայքում, որտեղ պատնեշներ չկան, ցանկացած ոք կարող էր մուտք գործել և այն շինությունում, որտեղ ենթադրաբար զենք են հայտնաբերել, ինչ ցանկանար, պահեր։
«Հիմա ես կարող եմ վարկած առաջ քաշել, որ ոմն Պողոս Պողոսյան եկել է և տարիների ընթացքում զենք կուտակել այստեղ, այստեղ բացարձակ իրավական տրամաբանություն չունենք: Մենք կասկածներ ունենք, որ այդ զենքը դիտավորյալ է բերվել, դրվել այստեղ, որ հետո կապեն Աշոտ Մինասյանի հետ»,-ասաց նա։
Միհրան Պողոսյանը նաև մանրամասնեց, որ «Կանթեղ» ռեստորանային համալիրը 2016թ.-ից այլևս Աշոտ Մինասյանի ընտանիքին չի պատկանում, «Ամերիա» բանկին է պատկանում, ոստիկանության ծառայողների կողմից 2016-2019 թթ.-երին գտնվել է մշտական պահպանության ներքո, ոստիկանության ծառայողներն էլ նշել են, որ նշված ժամանակահատվածում այդ տարածքում ընդհանրապես չեն հանդիպել Աշոտ Մինասյանին։
«Այս տիպի քրեկան գործով, այսպիսի ապացուցողական բազայով ՀՀ-ում որևէ անձ չի կարող քրեական պատասխանատվության ենթարկվել»,-շեշտեց նա։
