Միջազգային հանրությունը պետք է կողմնորոշվի ուժի չկիրառման սկզբունքի գործունության հարցում։ Այս մասին փետրվարի 2-ին Ավստրիայի ԱԳՆ ղեկավար Ալեքսանդր Շալենբերգի հետ համատեղ մամուլի ասուլիսում տեղեկացրել է ՀՀ ԱԳՆ ղեկավար Արարատ Միրզոյանը։
Պատասխանելով Ադրբեջանի հետ խաղաղության պայմանագրի ստորագրման հնարավորության եւ «կարմիր գծերի» մասին հարցին՝ նախարարը նշել է, որ պատասխաններն ավելի քան ակնհայտ են։
«Ես արդեն ասել եմ, որ ԵԱՀԿ ՄԽ համանախագահությունը միակ միջազգային ձեւաչափն է, որն օժտված է ղարաբաղյան հակամարտության կարգավորման ուղիների որոնման մանդատով։ Լուծումն առայժմ գտնված չէ, եւ բանակցություններն այդ ձեւաչափով պետք է շարունակվեն»,- ընդգծել է նախարարը։
Հայաստանի արտաքին քաղաքական գերատեսչության ղեկավարը նշել է, որ աշխատանքի արդյունքներից մեկը պետք է դառնա համընդհանուր խաղաղության համաձայնագրի պարամետրերի ճշտումը եւ, ըստ էության, դրա կնքումը։ «Սկզբունքներից մեկը ժողովուրդների ինքնորոշման իրավունքն է։ Մյուս սկզբունքը՝ ուժի չկիրառման սկզբունքը, 2020թ. կոպտորեն խախտվեց։ Ոչ միայն Հայաստանը եւ Արցախը, ամբողջ աշխարհը պետք է որոշի՝ մնո՞ւմ է արդյոք այդ սկզբունքը օրակարգում, թե՞ պետությունները կարող են ուժով լուծել ժողովուրդների ճակատագրերը։ Եթե կանոնը խախտվում է մեկի համար, ուրեմն, մյուսների համար էլ նման դուռ է բացվում»,- նախազգուշացրել է Արարատ Միրզոյանը։
