Թեպետ արդեն Հաագայի դատարանի միջանկյալ վճիռ ունենք, որն Ադրբեջանին պարտավորեցնում է բացառել մշակութային ժառանգության հուշարձանների նկատմամբ որևէ գործողություն, սակայն տեսնում ենք, որ Ադրբեջանը շատ ավելի գործողությունների է անցնում։ Այս մասին, այսօր՝ փետրվարի 16-ին, Երեւանում ՄԱԿ-ի գրասենյակի դիմաց Արցախում հայկական ժառանգության պահպանման պահանջով բողոքի ակցիայի ժամանակ լրագրողների հետ զրույցում ասաց ակցիայի կազմակերպիչներից «Հանուն հավասար իրավունքների կրթական կենտրոնի» ներկայացուցիչ, ԱԺ նախկին պատգամավոր Գայանե Աբրահամյանը։
«Եթե այսօր սրա դեմ չպայքարեցինք, ապա մենք կորցնելու ենք Արցախի հայկակականությունը, որովհետև ադրբեջանցիներն ուզում են Արցախի հայկականության հետքը ջնջել», - ասաց նա:
Գայանե Աբրահամյանի խոսքով՝ ՀՀ կառավարության ներկայացուցիչն էլ էր դիմել Հաագայի դատարան և ունեցել են պատմական նշանակության միջանկյալ վճիռ, որն Ադրբեջանին պարտավորեցնում էր բացառել մշակութային ժառանգության հուշարձանների նկատմամբ վանդալիզմի գործողությունները, ձևախեղումը, յուրացումը և պատժել նման գործողություններ կատարողներին:
Սակայն մենք տեսնում ենք, որ Ադրբեջանը շատ ավելի սանձարձակ գործողությունների է գնում, փոխում է մարտավարությունը և խնդիրը տանում է այլ դաշտ՝ իրեն դուրս բերելով իրավական դաշտից»,- նկատեց Աբրահամյանը և լկտի սուտ որակեց Ադրբեջանի այն հայտարարությունները, թե դարերով Արցախում առկա հայկական մշակութային ժառանգությունը հայերինը չէ:
Նա մտավախություն հայտնեց, որ եթե նպատակային գործողություններ չարվեն, ապա տարիներ շարունակ Ադրբեջանի առաջ տարած այդ ստին, հնարավոր է, որ արդեն հնարավոր չլինի հակազդել:
ՄԱԿ-ի հայաստանյան գրասենյակի դիմաց ակցիայի մասնակիցները պարզել էին հայկական մշակութային ժառանգության կոթողների լուսանկարներ և պաստառներ, որոնց վրա անգլերենով գրված էր. «Թույլ մի տվեք ազերիներին ոչնչացնել ու խեղաթյուրել պատմությունը», «Դուք պատասխանատու եք Արցախի ու Նախիջևանի մշակութային ցեղասպանության համար»:
