Նախագահական ընտրությունների՝ ապրիլի 24-ին կայանալիք երկրորդ փուլը կվերածվի Ֆրանսիայի ապագայի հարցով հանրաքվեի: Իր եզրափակիչ նախընտրական հարցազրույցում նման կարծիք է հայտնել Ֆրանսիայի նախագահ Էմանուել Մակրոնը, որն առաջադրվում է երկրորդ ժամկետով:
«Դա հանրաքվե է լինելու Ֆրանսիայի ապագայի մասին», - ասել է նա BFM հեռուստաալիքի եթերում՝ քվեարելու կոչ անելով ֆրանսիացիներին: Մակրոնի խոսքով՝ «2016 թվականին միլիոնավոր ընտրողներ ԱՄՆ-ում հարց էին տալիս իրենք իրենց՝ ինչի համար քվեարկել նախագահական ընտրություններում, սակայն Դոնալդ Թրամփի ընտրվելու հաջորդ իսկ օրը նրանք փոշմանեցին»:
«Ֆրանսիացիները պետք է ընտրություն անեն արժեքներով եւ երկրի ապագայի հանդեպ մոտեցումներով միմյանցից հիմնովին տարբերվող ծրագրերի միջեւ»,- ասել է Մակրոնը: «Սա ընտրություն է Եվրոպայում մնալու կամ չմնալու միջեւ»,- ասել է նա,- Երբ խոսքը Եվրամիության ծրագրերից դուրս գալու մասին է, ապա դա նշանակում է դուրս գալ ԵՄ-ից»:
Մեկնաբանելով հասարակական կարծիքի հարցումների արդյունքները, որոնք կանխատեսում են Մակրոնի հաղթանակը, ֆրանսիացի առաջնորդն ընդգծել է, որ «ոչինչ որոշված չէ, որոշում են ոչ թե հարցումները, այլ նրանք, ովքեր կգնան ընտրության»:
Անցկացված հարցումներից մեկի համաձայն՝ Մակրոնի օգտին պատրաստ է քվեարկել ընտրողների 55,5 տոկոսը: Նրա մրցակից, «Ազգային միասնություն» կուսակցության ղեկավար Մարին Լե Պենը կարող է ստանալ ձայների 44,5 տոկոսը:
