Բուլղարիան կձգտի ազատվել ռուսական նավթի ներկրման վրա Եվրամիությւան առաջարկած էմբարգոյից, եթե այդպիսի ժամկետ տրամադրվի, Capital ֆինանսական թերթին տված հարցազրույցում ասել է Բուլղարիայի փոխվարչապետ Ասեն Վասիլեւը։
ԵՄ-ն առաջարկել է փուլային էմբարգո սահմանել ռուսական նավթի ներկրման վրա՝ Մոսկվայի դեմ պատժամիջոցների նոր փուլի շրջանակներում:
Չորեքշաբթի օրը ԵՄ պաշտոնյաները համաձայնության չեն եկել էմբարգոյի շուրջ, սակայն նրանք կարող են ավելի մոտենալ համաձայնությանը հինգշաբթի օրը կայանալիք հանդիպման ժամանակ, Reuters-ին ասել է բանակցություններին ծանոթ պաշտոնյան:
Բուլղարիայի միակ նավթավերամշակող գործարանը՝ «Նեֆթոխիմ Բուրգասը», որը պատկանում է ռուսական ԼՈՒԿՕՅԼ-ին, վառելիքի հիմնական մատակարարն է բալկանյան երկրում, որն ամենաաղքատն է ԵՄ-ում:
Ասեն Վասիլեւն ավելի վաղ հայտարարել էր, որ նավթավերամշակման գործարանն արդեն մշակում է ռուսական նավթի 50 տոկոսը եւ ոչ ռուսական նավթի 50 տոկոսը եւ, ի վերջո, անհրաժեշտության դեպքում կկարողանա ամբողջությամբ հրաժարվել ռուսական նավթից:
«Բուլղարիան տեխնոլոգիապես կարող է առանց ռուսական հում նավթի էլ բավարարել իր կարիքները, բայց դա կհանգեցնի վառելիքի գների զգալի աճի»,- ասել է նա: «Ուստի, եթե Եվրահանձնաժողովը քննարկի բացառությունները, մենք կցանկանայինք օգտվել նման բացառություններից, քանի որ դա կբխի բուլղար սպառողների, բուլղարացի փոխադրողների եւ ընդհանրապես բուլղար ժողովրդի շահերից»,- ասել է նա:
Եվրահանձնաժողովի առաջարկած միջոցառումները ներառում են վեց ամսով ռուսական հում նավթի եւ նավթամթերքների մատակարարումների դադարեցում՝ մինչեւ 2022 թվականի վերջ:
Սլովակիան, Հունգարիան եւ Չեխիան արդեն ձգտում են նման բացառությունների հասնել: Չորեքշաբթի օրը ԵՄ-ի աղբյուրը Reuters-ին հայտնել է, որ Սլովակիան եւ Հունգարիան կկարողանան շարունակել ռուսական նավթի գնումը մինչեւ 2023 թվականի վերջը՝ համաձայն գործող պայմանագրերի:
Անցյալ շաբաթ Ռուսաստանը գազի դիմաց ռուբլով վճարելուց հրաժարվելու պատճառով դադարեցրել էր գազի մատակարարումը Բուլղարիային, որն իր կարիքների ավելի քան 90 տոկոսը «Գազպրոմ»-ի հաշվին էր բավարարում։