ՀԱՊԿ-ի պատասխանատվության գոտում եւ ամբողջ աշխարհում անվտանգության մարտահրավերների եւ սպառնալիքների քանակն անշեղորեն աճում է։ Այս մասին ՀԱՊԿ գագաթաժողովի արդյունքներով հայտարարել է ՀԱՊԿ գլխավոր քարտուղար Ստանիսլավ Զասը։
Նրա խոսքով, ՀԱՊԿ երկրների ղեկավարների գագաթաժողովի ընթացքում նշվել է, որ անվտանգությանը սպառնացող մարտահրավերների եւ սպառնալիքների թիվը ոչ միայն կազմակերպության պատասխանատվության ոլորտում, այլեւ ամբողջ աշխարհում անշեղորեն աճում է։ «Ռուսաստանի Դաշնության եւ նրա դաշնակիցների նկատմամբ համաշխարհային ուժերի եւ ռազմաքաղաքական դաշինքների ագրեսիվության կտրուկ աճը լուրջ մարտահրավեր է դարձել ՀԱՊԿ անդամ երկրների համար»,- ասել է նա։
Զասը նշել է, որ ՆԱՏՕ-ի ընդլայնումն ու քայլերը կհանգեցնեն Եվրոպայում լարվածության աճի։ «Ցավոք, եթե նախկինում խոսում էինք Արեւելաեվրոպական տարածաշրջանի ռազմականացման մասին, ապա այժմ դա կվերաբերի նաեւ Հյուսիսային Եվրոպային։ Ուստի դժվար է ասել, թե ինչով կավարտվի այդ ամենը, բայց մի բան պարզ է, որ դաշինքի քայլերը կհանգեցնեն Եվրոպայում լարվածության աճի»,- նշել է նա։
Զասը Մոսկվայում վերջին հոբելյանական գագաթաժողովը կառուցողական է անվանել։ «Իմ կարծիքով հանդիպումը շատ կառուցողական էր։ Ամեն դեպքում, շատ անկեղծ, վստահություն ներշնչող խոսակցություն տեղի ունեցավ հարցերի մի ամբողջ լայն շրջանակի շուրջ։
Նրա խոսքով՝ գագաթաժողովի ընթացքում քննարկվել են ձեւաչափի զարգացման հեռանկարները։ «Այն, որ ՀԱՊԿ-ը կաճի մեր կազմակերպության գործընկերների, դիտորդների եւ անդամների հետ, դա հեռանկար է»,- ասել է Զասը՝ չմանրամասնելով իր խոսքերը։
