Ավստրալիայի իշխանությունները մտադիր են վերսկսել ածխով աշխատող փակ էլեկտրակայանների շահագործումը՝ երկրում էներգետիկ ճգնաժամը հաղթահարելու համար։ Այդ մասին երեքշաբթի հայտարարել է ռեսուրսների նախարար Մադլեն Քինգը:
Նրա խոսքով՝ ածխով աշխատող հնացած էլեկտրակայանների աշխատանքի դադարեցումը, որը սկսվել է 2020 թվականին, «երկրի էներգետիկ ճգնաժամի հիմնական շարժիչ ուժն է», եւ, հետեւաբար, օպերատորները «պետք է հնարավորինս շուտ վերսկսեն դրանց շահագործումը, որպեսզի Ավստրալիան կարողանա հաղթահարել ձմեռը՝ լրացուցիչ 30 տոկոս էներգետիկ հզորություններ ստանալով»
Նախարարը նաեւ նշել է, որ ածխով աշխատող էլեկտրակայաններում ներդրումներ կատարելուց հրաժարվելը եւ դրանց շահագործումից հանելը վաղաժամ է եղել, քանի որ երկիրը չունի էներգիայի վերականգնվող բավարար աղբյուրներ՝ դրանց փակման հետեւանքով առաջացած էլեկտրաէներգիայի պակասը փոխհատուցելու համար։ «Մենք իրոք պետք է ածխով աշխատող էլեկտրակայանները նորից գործարկենք, քանի որ հենց հիմա դա է ճգնաժամից դուրս գալու միակ ելքը»,- ընդգծել է նա։
Ավելի վաղ երկրի կլիմայի փոփոխության եւ էներգետիկայի նախարար Քրիս Բոուենը նշել էր, որ գազի անբավարարության եւ էլեկտրաէներգիայի թանկացման պատճառով Ավստրալիան հայտնվել է երկրի պատմության մեջ ամենալուրջ էներգետիկ ճգնաժամի շեմին։ Ավստրալիայի իշխանությունների տվյալներով՝ մայրցամաքի հարավարեւելյան եւ արեւելյան ափերին ցուրտը մեծացրել է սպառողների կողմից գազի եւ էլեկտրաէներգիայի պահանջարկը, ինչը, համաշխարհային էներգիայի բարձր գների հետ մեկտեղ, առաջացրել է մատակարարման ճգնաժամ եւ զանգվածային անջատումներ: Գազի մեծածախ գները գերազանցել են պատմական առավելագույն ցուցանիշները՝ հունիսի առաջին շաբաթվա ընթացքում աճելով 800 տոկոսով՝ 10 ավստրալական դոլարից (7,17 ԱՄՆ դոլար) մինչեւ 800 ավստրալական դոլար (573,28 ԱՄՆ դոլար) մեկ գիգաջոուլի համար (25,5 խորանարդ/մետր):