Նախարար Լավրովի հետ քննարկման կարեւորագույն թեմաներից մեկը Հայաստանի եւ Ադրբեջանի միջեւ հնարավոր փաստաթուղթն էր, ԼՂ հիմնախնդրի կարգավորման հետ կապված հարցերը։ Այս մասին ՌԴ ԱԳ նախարար Սերգեյ Լավրովի հետ հանդիպման արդյունքներով կայացած մամուլի ասուլիսում հայտարարել է Արարատ Միրզոյանը։
«Ես հաստատեցի տարածաշրջանում խաղաղության եւ կայունության հասնելու համար ջանքեր գործադրելու Հայաստանի կառավարության պատրաստակամությունը։ Այս համատեքստում առանցքայինը ԼՂ հակամարտության հասցեականությունն է, որը կներառի Լեռնային Ղարաբաղի ժողովրդի անվտանգության իրավունքի ապահովումը եւ վերջնական կարգավիճակի որոշման բոլոր իրավունքներն ու հիմնարար կետերը»,- ասել է Միրզոյանը։ Նա հիշեցրել է, որ կարգավորման սկզբունքները մշակվել են ԵԱՀԿ Մինսկի խմբի համանախագահների կողմից, եւ «մենք շահագրգռված ենք ակտիվացնել միջազգային մանդատով օժտված այս կառույցը»։
Արտգործնախարարն ընդգծել է Ռուսաստանի Դաշնության դերը Արցախի դեմ Ադրբեջանի ագրեսիան դադարեցնելու գործում, իսկ ռուսական խաղաղապահ զորակազմի տեղակայումը, որպես սադրանքները կանխելու եւ Լեռնային Ղարաբաղի ժողովրդի անվտանգության ապահովման գործոն, կոչված է պայմաններ ստեղծել կյանքի նորմալ հուն վերադառնալու, անվտանգության եւ կայունության ապահովման համար:
«Հայաստանը շարունակում է հավատալ, որ ռուսական խաղաղապահ առաքելությունն ի վիճակի է նոյեմբերի 9-ի հայտարարությամբ հաստատված ստատուս քվոն վերականգնել այնպես, ինչպես եղել է այս տարվա մարտի 23-ին, որը խախտվել էր մարտի 24-ին Ադրբեջանի զինված ուժերի ներխուժմամբ Ղարաբաղի Փառուխ գյուղ»,- ասել է արտգործնախարարը՝ բարձր գնահատելով նոյեմբերի 9-ի հայտարարության դրույթների կատարման ուղղությամբ Ռուսաստանի Դաշնության ջանքերը, այդ թվում՝ գերեվարված հայերի վերադարձի կարեւորագույն խնդիրը։ Նախարարը նշել է, որ այդ ջանքերի շնորհիվ հնարավոր է եղել գերիներից մի քանիսին վերադարձնել Հայաստան, սակայն մեկուկես-երկու տարի անց Ադրբեջանը, խախտելով միջազգային հումանիտար իրավունքը, խոչընդոտում է հայտարարության դրույթների իրագործմանը եւ հրաժարվում է վերադարձնել գերիներին ու կալանավորներին։ «Հուսով ենք, որ ռուսական կողմն էլ ավելի մեծ ջանքեր կգործադրի այս ուղղությամբ»,- ասել է Միրզոյանը։
Նախարարն ընդգծել է հայկական մշակութային ժառանգության պահպանման կարեւորությունը Ադրբեջանի վերահսկողության տակ գտնվող տարածքներում։ «Ես ընդգծեցի, որ վանդալիզմի եւ պատկանելության մասին խեղաթյուրման ֆոնին խնդիրը պահանջում է միջազգային հրատապ միջամտություն։ Չեմ կարող չնշել նաեւ Ադրբեջանի ղեկավարության կողմից հայատյացության հռետորաբանությունը, շարունակվող սադրանքները եւ հրադադարի ռեժիմի պարբերական խախտումները»,- ասել է Միրզոյանը։