Ի՞նչ նշաձողեր պետք է իջեցնենք: Մենք միայն կարմիր գծեր ունենք: Դա կարգավիճակն է: Ամբողջ հասարակությունն այս հարցում միասնական է։ Այս մասին լրագրողների հետ զրույցում ասաց Արցախի Հանրապետության արտաքին գործերի նախարար Դավիթ Բաբայանը։
Պատասխանելով Արցախի վերաբերյալ Հայաստանում իշխող կուսակցության ներկայացուցիչների հայտարարությունների մասին հարցին՝ նախարարը նշեց. «Պաշտոնական Երեւանը որեւէ նոր բան չի ասել Արցախի կարգավիճակի ու ճակատագրի մասին։ Ասել են պատգամավորները, դրան հետեւեց արձագանքը տարբեր խողովակներով։ Մեզ համար դա անընդունելի է։ Ով էլ ասի»:
«Արցախը փրկելու հնարավորություն կա: Եւ ոչ մեկին պետք չէ մեղադրել՝ մենք ինքներս ենք պատասխանատու մեր ճակատագրի համար։ Մյուս երկրներն իրենց շահերն ունեն, դա հասկանալի է։ Եւ գործընթացներով պետք է զբաղվեն պրոֆեսիոնալները, այլ ոչ թե ամբոխները»,- շարունակեց Դավիթ Բաբայանը: