Սպիտակ տունը ԱՄՆ նախագահ Ջո Բայդենի համար մանրամասն հրահանգներ է պատրաստում, թե ինչպես իրեն պահի հանրության առջեւ։ Դրանցից մեկը նա պատահաբար ցուցադրել է ունկնդիրներին, տեղեկացրել է Fox News-ը։
Լուսանկարներում, որոնք արվել են քամու էներգետիկայի վերաբերյալ նահանգապետերի, արհմիութենական առաջնորդների եւ մասնավոր ընկերությունների ներկայացուցիչների հետ խորհրդակցության ժամանակ, նախագահը հատուկ թերթիկ ուներ ձեռքին։ Լուսանկարներից մեկում նկատվում է ԱՄՆ նախագահի ելույթի տեքստը, մյուսում՝ «ցուցումների» ցանկը։
«Դուք մտնում եք Ռուզվելտի սրահ եւ ողջունում հանդիպման մասնակիցներին։ Նստում եք ձեր տեղը։ Մամուլն է մտնում»,- տեսել են Բայդենի ծածկաթերթիկներից մեկի վրա։
Սպիտակ տանն ընդգծել են, որ նման թերթիկները սովորական երեւույթ են։
«Դա ստանդարտ ձեւաչափ է, որն օգտագործում են քաղաքական եւ պետական գործիչները հանրային միջոցառումների ժամանակ»,- նշել են աշխատակազմում։
