Եգիպտոսը եւ Սերբիան գործընկերության հռչակագիր են ստորագրել։ Կստորագրվի նաեւ ազատ առեւտրի մասին համաձայնագիր, հաղորդում է AP-ը։
Եգիպտոսի նախագահ Աբդել Ֆաթթահ ալ Սիսին այս շաբաթ եռօրյա այցով Սերբիայում էր։ Սա Եգիպտոսի նախագահի առաջին այցն է ավելի քան երեք տասնամյակների ընթացքում: Սերբիայի նախագահ Ալեքսանդր Վուչիչը այցը «պատմական» է համարել։
Երկու երկրների ղեկավարները ստորագրել են գործընկերության հռչակագիր, Վուչիչը ալ Սիսիին շնորհել է պետական մրցանակ եւ հայտարարել մինչեւ տարեվերջ ազատ առեւտրի համաձայնագիր ստորագրելու պլանների մասին։ Տեղի է ունեցել գործարար համաժողով, որի ընթացքում պաշտոնյաները ստորագրել են համագործակցության ոլորտներին նվիրված մի շարք գործարքներ։
«Մեր երկու երկրները պետք է միասին աշխատեն՝ բարելավելու տնտեսությունը՝ պայմանավորված համաշխարհային իրադարձություններով»,- ասել է ալ Սիսին։
Վուչիչը հայտնել է, որ Սերբիան հացահատիկ, հիմնականում ցորեն կարտահանի Եգիպտոս, որը մեծ վնաս է կրել ուկրաինական հակամարտության պատճառով գների բարձրացումից։
