Ֆրանսիան, Իտալիան եւ Իսպանիան ուժեղացնում են ճնշումը Եվրահանձնաժողովի վրա, որպեսզի վերջինը մշակի օրենք, որը կերաշխավորի, որ խոշոր տեխնոլոգիական ընկերությունները մասամբ ֆինանսավորեն հեռահաղորդակցային ենթակառուցվածքը ԵՄ-ում։ Այս մասին տեղեկացրել է Reuters-ը՝ հղում կատարելով համապատասխան փաստաթղթին։
Մայիսին ԵՄ-ի կարգավորող մարմինները հայտարարել էին, որ ուսումնասիրում են այն հարցը, թե արդյոք Alphabet Google, Meta եւ Netflix տեխնոլոգիական հսկաները իրենց վրա կվերցնեն հեռահաղորդակցային ցանցի արդիականացման ծախսերի մի մասը։
Երեք երկրների կառավարությունները համատեղ փաստաթղթում հայտարարել են, որ կոնտենտի վեց ամենամեծ մատակարարներին բաժին է ընկնում ինտերնետ-թրաֆիկի 55 տոկոսը։ «Դա որոշակի ծախսեր է առաջացնում կապի եվրոպական օպերատորների համար՝ թողունակության տեսակետից, այն դեպքում, երբ նրանք արդեն հսկայական միջոցներ են ներդնում 5G ցանցում»,- նշվել է փաստաթղթում։
Երկրները կոչ են անում եվրոպական հեռահաղորդակցային ցանցերին եւ օնլայն-կոնտենտի խոշոր պրովայդերներին վճարել ցանցային ծախսերի համար։ «Մենք կոչ ենք անում օրենսդրական առաջարկով հանդես գալ... որպեսզի շուկայի մասնակիցներն իրենց ավանդը ներդնեն թվային ենթակառուցվածքի ծախսերում»,- նշվել է փաստաթղթում։