Ռուսաստանցի զինվորականները Ուկրաինայում հատուկ գործողության ընթացքում ոչնչացրել են վեց արձակող սարք եւ Համազարկային կրակի հրթիռային համալիրների ավելի քան 200 HIMARS հրթիռ, 33 հատ М777 ամերիկյան հաուբից եւ Harpoon հինգ արձակող սարք, տեղեկացրել է ՌԴ պաշտպանության նախարար Սերգեյ Շոյգուն, փոխանցել է «ՌԻԱ Նովոստի»-ն։
«Արեւմտյան սպառազինությունների չվերահսկվող մատակարարումներն Ուկրաինա լրջորեն սպառնում են տարածաշրջանի անվտանգությանը։ Ռուսական զորքերի հարվածների արդյունքում ոչնչացվել են 33 հատ М777 ամերիկյան հաուբից, Harpoon հինգ արձակող սարք։ Ինչպես նաեւ վեց արձակող սարք եւ ավելի քան 200 HIMARS հրթիռ»,- ասել է Շոյգուն հեռակապով խորհրդակցության ժամանակ։
Նրա խոսքով՝ անցած վեց շաբաթում ուկրաինական զորքերը «զրկվել» են 396 Javelin եւ NLAW հակատանկային հրթիռային համալիրներից, 125 «Սթինգեր» շարժական զենիթային հրիթռային համալիրներից։
«Լուգանսկի Ժողովրդական Հանրապետության տարածքը վերահսկողության տակ վերցնելուց հետո պլանային կերպով ազատագրվում է Դոնեցկի Ժողովրդական Հանրապետությունը։ Վերջին ժամանակներս ազատագրվել են Գրիգորովկա, Բերեստովոյե, Ստրյապովկա, Պոկրովսկոյե, Սեմիգորիե եւ Նովոլուգանսկոյե բնակավայրերը։ Մեր վերահսկողության տակ է անցել Եվրոպայում ամենամեծ՝ Ուգլեգորսկի 3 հազար 600 մեգավատ նախագծային հզորությամբ ջերմաէլեկտրակայանը»,- ասել է Շոյգուն։