Բրիտանացի գիտնականները նշել են սմարթֆոնների եւ այլ գաջեթների դրական ազդեցությունը մարդու հիշողության վրա։ Հետազոտությունը հրապարակվել է Journal of Experimental Psychology: General ամսագրում:
Լոնդոնի համալսարանական քոլեջի (UCL) մասնագետների կարծիքով՝ սմարթֆոնների հանդեպ կիրքը հաճախ կապված է հիշողության հետ կապված խնդիրների հետ։ Սակայն թվային օգնականների օգտագործումը, հակառակը, օգնում է մարդկանց պահպանել եւ հիշել կարեւոր տեղեկատվությունը։
Հիշողության վրա գաջեթների ազդեցությունը ցուցադրելու համար գիտնականները թեստ են մշակել, որը կարելի էր անցկացնել սմարթֆոնի կամ պլանշետի միջոցով: Թեստավորմանը մասնակցել է 18-ից 71 տարեկան 158 կամավոր։ Փորձի ընթացքում մասնակիցներին 12 համարակալված շրջանակներ են ցույց տվել, որոնք նրանք պետք է քաշեին աջ կամ ձախ։ Առաջադրանքները հաջողությամբ կատարելու համար միավորներ էին շնորհվում։
Արդյունքները ցույց են տվել, որ կամավորները հակված են եղել օգտագործել իրենց սմարթֆոնները՝ պահելու համար տեղեկատվությունն այն շրջանակների մասին, որոնք ամենաշատ միավորներ էին բերում քաշելու համար: Գաջեթների օգտագործումը նրանց օգնել է 18 տոկոսով ավելի լավ հիշել տեղեկատվությունը: Մասնակիցները սկսել են հիշել նաեւ այլ շրջանակների մասին տեղեկություններն առանց տեխնիկայի օգտագործման՝ 27 տոկոսով ավելի լավ:
«Երբ մարդկանց թույլ է տրվել օգտագործել արտաքին հիշողությունը, սարքն օգնել է նրանց հիշել այն տեղեկատվությունը, որը նրանք պահել են դրանում: Դա զարմանալի չէ, բայց մենք նաեւ պարզել ենք, որ սարքը բարելավում է մարդկանց հիշողությունը նաեւ չպահված տեղեկատվության համար»,- ընդգծել է բժիշկ Սեմ Գիլբերտը: