Չինական MetalFish ընկերությունը ստեղծել է նոր համակարգչային կորպուս՝ Y2 Fish Tank Chassis անվանմամբ, տեղեկացրել է Tom's Hardware պորտալը։ Դրա առանձնահատկությունը ներկառուցված ակվարիումն է ձկնիկների համար։
Ըստ MetalFish-ի՝ կառույցը թույլ կտա անհատական համակարգիչ ունեցողներին իրենց «հանգիստ եւ թուլացած» զգալ։ Կորպուսի չափերն են՝ 370x250x290 միլիմետր։ Պորտալի հաշվարկներով, եթե ակվարիումը զբաղեցնի կորպուսի մոտ կեսը, ապա դրա տարողունակությունը կկազմի մոտ 13 լիտր։
Համակարգիչ-ակվարիումը կունենա զտիչ պոմպ՝ USB-ին միացմամբ։ Արտադրողը չի տեղեկացրել, թե արդյոք համակարգիչն ավելի շատ կտաքանա ակվարիումի առկայությունից, բայց Tom's Hardware-ը ավելի շատ անհանգստացած է ձկնիկների համար. նշվել է, որ համակարգչով երկար խաղալը կարող է տաքացնել ջուրը՝ ձկնիկների համար անհարմարավետ իրադրություն ստեղծելով։
Y2 Fish Tank Chassis-ի արժեքը Չինաստանում կազմում է մոտ 75 դոլար։