Ռադիոտեխնիկական հետախուզության եւ ռադիոէլեկտրոնային պայքարի բրիտանական ինքնաթիռը խախտել է Ռուսաստանի Դաշնության պետական սահմանը Սվյատոյ Նոս հրվանդանի տարածքում, հայտնում է ՏԱՍՍ-ը՝ հղում անելով ՌԴ պաշտպանության նախարարությանը։
«Բարենցի ծովի ջրերում հերթապահություն իրականացնող հակաօդային պաշտպանության հերթապահ ուժերը հայտնաբերել են անհայտ օդային թիրախ, որը շարժվում էր դեպի ՌԴ պետական սահման։ Պետական սահմանի խախտումը կանխելու համար ՀՕՊ-ի հերթապահ ուժերի կազմից բարձրացվել է «ՄիԳ-31ԲՄ» կործանիչ, որը նույնականացրել է այն որպես բրիտանական ռազմաօդային ուժերի ռադիոտեխնիկական հետախուզության եւ ռադիոէլեկտրոնային պայքարի RC-135 ինքնաթիռ»,- ասվում է հաղորդագրության մեջ։
Ռուսական կործանիչի անձնակազմի գործողություններով հետախուզական ինքնաթիռը դուրս է բերվել Ռուսաստանի Դաշնության տարածքից։
