ԱՄՆ առաջատար վարակաբան Դոկտոր Էնթոնի Ֆաուչին երկուշաբթի հայտարարել է, որ ավելի քան հինգ տասնամյակ ծառայությունից հետո դեկտեմբերին կլքի դաշնային կառավարությունը, հաղորդում է AP-ն:
Ֆաուչին, որը ԱՄՆ նախագահ Ջո Բայդենի գլխավոր բժշկական խորհրդականն է, եղել է Ալերգիայի եւ վարակիչ հիվանդությունների ազգային ինստիտուտի տնօրեն եւ իմունակարգավորման NIAID լաբորատորիայի ղեկավար: Նույնիսկ մինչեւ կորոնավիրուսի հայտնվելը, նա ՄԻԱՎ/ՁԻԱՀ-ի եւ այլ վարակիչ հիվանդությունների դեմ պայքարի դաշնային միջոցների առաջատարներից մեկն էր:
«Ես կթողնեմ պաշտոնները այս տարվա դեկտեմբերին՝ իմ կարիերայի հաջորդ գլուխը սկսելու համար»,- ասում է Ֆաուչին հայտարարության մեջ՝ իր պաշտոններն անվանելով «ողջ կյանքի պատիվ»։
ԱՄՆ նախագահ Ջո Բայդենն իր հերթին բարձր է գնահատել դոկտոր Ֆաուչիի գործունեությունը։
«Անկախ նրանից՝ դուք անձամբ հանդիպել եք նրա հետ թե ոչ, նա իր աշխատանքով առնչվել է բոլոր ամերիկացիների կյանքին: Իմ խորին շնորհակալությունն եմ հայտնում նրա պետական ծառայության համար։ Նրա շնորհիվ Ամերիկայի Միացյալ Նահանգները դարձել է ավելի ուժեղ, ավելի դիմացկուն եւ ավելի առողջ»,- ասվում է Բայդենի հայտարարության մեջ:
